Noriega non cre que o conflito de En Marea cree un "efecto contaxio" a nivel municipal
O alcalde de Santiago agradece o "apoio sen fisuras" mostrado por Luís Villares
Por E.P. | SANTIAGO DE COMPOSTELA | 11/01/2019 | Actualizada ás 13:55
O alcalde de Santiago de Compostela, Martiño Noriega, mostrouse confiado en que o conflito que vive En Marea a nivel autonómico non produza un "efecto contaxio" no espazo político de Compostela Aberta. Segundo expresou, non lle preocupa que poida afectar á formación de cara ás eleccións municipais de maio.
Aínda que admitiu que existen "vasos comunicantes", Noriega explicou que "as dinámicas locais distan moito das doutros ámbitos", e puxo como exemplo a súa experiencia en Teo: "Pasou que uns meses antes das eleccións locais, o voto ao Bloque nas europeas non chegou ao 10 por cento, e nas municipais tivemos maioría absoluta", dixo en referencia á súa etapa na formación nacionalista, que acabou abandonando.
O rexedor compostelán destacou o "esforzo en preservar o espazo político de Compostela Aberta" e a importancia de "coidalo", ademais de mostrarse convencido de que "non hai efecto contaxio nin tradución do conflito e da dinámica a nivel galego".
Nesta liña, profundou na necesidade de "ser responsable e preservar o espazo local". Martiño Noriega afirmou que na formación "habitan persoas de todo tipo de posicións con respecto ao ámbito galego, pero que a nivel local teñen claro que gobernar Compostela é un reto e unha responsabilidade que vale a pena".
Por iso argumentou que non será el "o que non consinta este espazo". "Esperamos que non haxa contaxio e coidaremos o espazo para seguir liderando o proceso de cambio no que está a cidade", remarcou.
RESPOSTA A VILLARES
Na rolda de prensa posterior á Xunta de Goberno Local, agradeceu a mensaxe de "apoio sen fisuras" expresado polo líder de En Marea, Luís Villares. "Todos os apoios parécennos marabillosos", afirmou Noriega, que engadiu que "nunca sobran".
A fío disto bromeou ao explicar que agradece ao deán cando lle di que reza por el: "Nunca se sabe onde vai precisar de todo tipo de recomendacións, tamén no máis aló".
