Por E.P. | SANTIAGO DE COMPOSTELA | 18/01/2019 | Actualizada ás 13:57
O portavoz de Industria do PSOE, Ángel Mato, celebrou este venres o acordo alcanzado con Alcoa e recriminou ao presidente da Xunta, Alberto Núñez Feijóo, de "esperar cos brazos cruzados", mentres que por parte do BNG alertaron de que a compañía ten "un plan oculto" para eliminar a competencia.
Mato destacou, nun comunicado, "o esforzo e o traballo" desempeñado polo Ministerio de Industria, Comercio e Turismo, xunto ao Ministerio para a Transición Ecolóxica e o Ministerio de Traballo para alcanzar un preacordo entre a empresa e os traballadores "co obxectivo de manter os seus empregos e evitar despedimentos".
O portavoz socialista sinalou que o Goberno se puxo a traballar desde o minuto cero coa empresa e os representantes sindicais" para a procura de solucións para Avilés e A Coruña, "fronte á indolencia do Goberno de Núñez Feijóo", que, ao seu xuízo, "permaneceu cos brazos cruzados á espera de que se resolva o problema".
"O Goberno de Pedro Sánchez demostrou un compromiso claro coas familias, coa industria española e coa economía daquelas zonas nas que se asentan estas empresas, que se viron moi afectadas coa desaparición destes importantes elementos tractores que xeran emprego directo e indirecto", concluíu Mato.
"UN MAL PUNTO DE PARTIDA"
Por outra banda, a portavoz parlamentaria de Industria do BNG, Noa Presas, mostrou, en rolda de prensa, a súa preocupación sobre o "conformismo" que, ao seu xuízo, mantiveron o Partido Socialista e o Partido Popular ante un preacordo que é "un mal punto de partida", xa que "non garante os 400 postos de traballo" e tampouco "o mantemento da actividade electrointensiva".
"Alcoa ten un plan oculto para eliminar competencia e tanto o Goberno do Estado como a Xunta están a comprarlle esa estratexia", engadiron os nacionalistas galegos. Segundo Presas, este acordo vai levar á Alcoa a unha situación técnica "que vai dificultar moito o arranque da electrólise" e que vai ter un custo económico "que vai facer que moitos posibles investidores desistan desta cuestión".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.