Un galego precisa 7,3 anos de soldo íntegro para pagar unha vivenda

O prezo dunha vivenda nova de tipo medio aumentou en todas as comunidades autónomas do terzo norte do país en 2018, co 4,2% rexistrado en Navarra á cabeza, aínda que por baixo da media do conxunto nacional, que se sitúa no 5,4%.

Segundo o informe realizado pola Sociedade de Tasación para o norte de España, a Navarra séguelle o País Vasco, cun 2,3% de aumento; Cantabria, cun 2,2%; Galicia, cun 2,1%; e Asturias, cun 1,6%, fronte ao 5,4% que creceu o conxunto do país.

O informe tamén revela que o esforzo inmobiliario, é dicir, o número de anos de soldo íntegro que un cidadán con ingresos medios necesita destinar á compra dunha vivenda de tipo medio, tamén se atopa no caso do norte de España por baixo da media no conxunto do país de 7,6 anos.

Así, País Vasco e Galicia son as comunidades que máis se achegan a este media, ao ser necesarios ata 7,3 anos de soldo íntegro para pagar unha vivenda nestas rexións, seguidas de Cantabria, onde fan falta 6,9 anos e Asturias, rexión onde son necesarios 5,4 anos.

En canto ao prezo por metro cadrado, San Sebastián, onde se sitúa en 3.515 euros/m2, configúrase como a cidade máis cara do norte peninsular, tras rexistrar un aumento do 2,2% o pasado ano, aínda que a capital navarra, Pamplona, cun prezo de 1.889 euros/m2, é onde máis creceron, un 4,2%.

CONFIANZA E ACCESIBILIDADE

Respecto ao Índice de Confianza Inmobiliario, mentres que en Asturias, Cantabria e País Vasco aumentou, pasando de 56,9 a 57,3, de 54,4 a 54,8 e de 60,3 a 60,5, respectivamente, en Navarra baixa de 58,1 a 57,6 e en Galicia de 57.3 a 55,6. A media nacional descendeu sete décimas, ata os 57 puntos.

Pola contra, o Índice de Accesibilidade á Vivenda, que estima a relación entre o poder adquisitivo real dun cidadán medio e o teórico necesario para acceder a unha vivenda, mellorou en Galicia, pasando de 108 a 109 puntos e tamén en Asturias (de 135 a 143 puntos) e en Cantabria (de 107 a 113 puntos).

Con todo, empeorou en Navarra, pasando de 129 a 125 puntos e no País Vasco, onde descendeu un punto, ata os 102 puntos. A media nacional tamén baixou, pasando de 104 a 102 puntos.