Gloria Lago e Galiza Nova non concilian nos xulgados
Por Galicia Confidencial | Vigo | 06/09/2011 | Actualizada ás 18:50
Esta mañá celebrouse diante dos Xulgados de Vigo o acto de conciliación pola segunda demanda interposta pola presidenta de Galicia Bilingüe, Gloria Lago, contra Galiza Nova por un presunto delicto de deshonra e calumnias polo que reclama, coma na anterior, unha indemnización de 30.000 euros á organización xuvenil nacionalista.
A Secretaria Xeral de Galiza Nova, Iria Aboi, expuxo á saída do acto, posposto ata as 12:30 para a acreditación das partes, que “non houbo acordo no acto de conciliación” e que polo tanto “reafirmámonos en que non houbo ataque nin inxuria algunha contra Gloria Lago senón que recollemos as críticas pola súa actitude discriminatoria cara o galego”. “Do que se falaba no boletín era das actitudes de hostilidade contra o galego nas aulas do IES Santomé – engadíu-, non da vida privada de ninguén”.
A secretaria Xeral de Galiza Nova asegurou que estamos ante unha denuncia que “persigue criminalizar a maior organización xuvenil de Galiza e a defensa que facemos da lingua galega especialmente entre a xente nova”.
