Por E.P. | SANTIAGO DE COMPOSTELA | 07/02/2019 | Actualizada ás 12:13
A avogada de Alfonso Santalices, que perdeu as eleccións a presidir o Colexio de Odontólogos de Lugo por un voto, apremou a repetición dos comicios no ente profesional tras unha sentenza do Tribunal Superior de Xustiza de Galicia na que se que confirma a anulación da convocatoria e que ordena un novo proceso.
A letrada Cristina Pérez Salgado considera que "habería que repetir as eleccións porque esta sentenza confirma a sentenza que previamente ditara o Contencioso e o fallo recolle claramente que declara nulo a acta electoral e ordena a convocatoria dun novo proceso electoral". "Non fai falta interpretar nada porque o din moi claro as dúas resolucións xudiciais", abundou.
O que motivou estes recursos xudiciais foi a destrución de 12 votos enviados por correo tras ser declarados nulos. Outra causa para recorrer radica na constitución da mesa electoral no marco desas eleccións, celebradas o 23 de xuño do 2016 e que lle deron a vitoria a Alejandro López Quiroga fronte a Santalices.
Cristina Pérez aclarou que a sentenza do TSXG pódese recorrer "en casación ante o Tribunal Supremo", algo para o que xa están preparados. "Nós teriamos que contestar ese recurso", puntualizou.
Con todo, a letrada lucense puntualiza que o seu cliente, Alfonso Santalices, pode pedir "a execución provisional" do veredicto xudicial -que pasaría por repetir esas eleccións- ao Colexio de Odontólogos de Lugo. "Teriamos que ver as consecuencias xurídicas dunha execución provisional, no caso de que se recorra en casación ante o Supremo", advirte.
Pérez Salgado avisa de que se a outra parte non recorre, "se se declara firme a sentenza, ou ben se cumpre voluntariamente e fan o que ordena o fallo xudicial" ou ben pedirán "a execución forzosa" da mesma, conclúe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.