Tres detidos nun grupo criminal que distribuía heroína dende Arousa
A operación antidroga levouse a cabo conxuntamente entre Galicia e Asturias e incautouse medio quilo de dita substancia estupefaciente, ademais de 45 plantas de marihuana e 9.000 euros.
Por Europa Press / Redacción | PONTEVEDRA | 07/02/2019 | Actualizada ás 13:37
A Garda Civil e a Policía Nacional detiveron tres individuos en Galicia e Asturias no marco dunha operación antidroga conxunta o pasado 1 de febreiro. Todos eles eran integrantes dun grupo criminal asentado na comarca pontevedresa de Arousa dedicado á distribución de heroína.
Segundo informou o Ministerio de Interior, o 1 de febreiro púxose en marcha un dispositivo conxunto coordinado polas unidades antidroga e procedeuse á detención dun dos compoñentes do grupo criminal na localidade de Torce (Asturias), tras interceptalo cando circulaba a bordo dun vehículo.
Despois dun cacheo de seguridade, os axentes comprobaron que portaba entre as súas roupas case 200 gramos de heroína. Horas máis tarde, detívose na localidade coruñesa de Milladoiro a un veciño de Vilanova de Arousa (Pontevedra) cando circulaba nun todoterreo.
Neste caso, despois do correspondente cacheo de seguridade, os axentes atoparon entre as súas roupas parte do suposto pago da sustancia estupefaciente. Posteriormente, foi detido na localidade pontevedresa de Portonovo o fillo deste, que "tamén formaba parte da armazón delituosa", aseguran as mesmas fontes.
Os axentes policiais levaron a cabo un rexistro esa mesma tarde nun domicilio de Vilanova de Arousa, no que se incautaron de 300 gramos máis de heroína, 45 plantas de marihuana e 9.000 euros.
Para o desenvolvemento do dispositivo, contaron co apoio dunha patrulla da Garda Civil do posto da Caridade (Asturias), do Servizo Cinolóxico da Garda Civil de Pontevedra e dos Grupos de Estupefacientes das Comisarías Provinciais de Lugo e Pontevedra.
PRISIÓN PARA DÚAS
Os detidos foron postos a disposición da autoridade xudicial, que decretou o ingreso en prisión de dous dos detidos na denominada 'Operacióm Rescates'.
Este operativo foi desenvolvido pola Unidade de Droga e Crime Organizado (Udyco) da Policía Nacional de Pontevedra e o Equipo contra o Crime Organizado (ECO Galicia) da Garda Civil. Foi dirixida pola xuíza titular do Xulgado de Primeira Instancia e Instrución número 3 de Vilagarcía de Arousa e polo fiscal especial delegado antidroga da provincia de Pontevedra.
