A Xunta ve duplicadas as axudas ás familias modestas con fillos

 A Consellería de Traballo e Benestar recoñece que os novos criterios para acceder ás axudas por fillo a cargo menor de tres anos deixarán fóra a un bo número de familias que ata o de agora a viñan percibindo. Pero en lugar de apelar á crise ou aos recortes orzamentarios, o departamento que dirixe Beatriz Mato xustifica a decisión para evitar "duplicidades" nas prestacións dirixidas a pais con fillos nesta franxa de idade, que tamén teñen dereito a unha desgrabación á hora de facer a renda.

A Xunta ofrece a todas as familias unha deducción fiscal por nacemento ou adopción de fillos de entre 300 e 360 euros ao ano que, ata o de agora, era perfectamente compatible coa prestación económica de Benestar. Pero segundo as explicacións facilitadas por esta consellería a Faro de Vigo, que hoxe fíxose eco da información publicada por GC o 20 de setembro, a Xunta considera que esta situación é unha "duplicidade" e por ese motivo decidiu evitala "clarificando" os requisitos para acceder á paga anual por fillo menor de tres anos.

A orde do 30 de decembro de 2010 pola que se regulan as bases das axudas para este ano fixa como requisito que os solicitantes non estean obrigados a facer a declaración da renda por mor dos seus ingresos e, a maiores, engade que tampouco a presentaran "de forma voluntaria". Este cambio resulta crucial xa que, na práctica, supón excluir de golpe a todas aquelas familias que para poder desgrabar a hipoteca ou porque lles sae a devolver, presentaron en 2010 a declaración da renda.

O argumento de Traballo é que estas familias xa teñen cuberta a axuda porque, ao facer a declaración, desgraban entre 300 e 360 euros polos seus fillos menores de tres anos. Pero o certo é que todas as familias galegas podían acceder xa a esta deducción, mentres que a paga anual dos 360 euros estaba pensada en exclusiva para rentas familiares inferiores aos 22.000 euros.

A apelación que fai o departamento de Beatriz Mato a unha suposta inxusticia no reparto das axudas, polo tanto, non se pode entender cando as únicas familias que tiñan a posibilidade de cobrar en Galicia polas dúas vías (a deducción fiscal e a paga de Traballo) eran as de rentas medias e baixas. A situación anterior favorecía ás familias máis modestas, como debería ocurrir con calquera tipo de axuda de carácter social, mentres que os cambios introducidos perxudican precisamente aos pais con menos ingresos e á súa costa a Xunta logrará un recorte do 43% no orzamento destinado a unha prestación que puxo en marcha no seu día Manuel Fraga.