Denuncian en Bruxelas o emprego "incorrecto" de fondos europeos contra incendios en Galicia

A asociación Petón do Lobo denunciou na comisión de peticións do Parlamento Europeo o emprego "incorrecto" de fondos europeos na política forestal galega. Segundo asegura a eurodeputada galega Lídia Senra, o PP bloqueou esta petición relacionada co uso de fondos europeos por parte da Xunta en materia de incendios.

"Representantes do PP español, con Millán Mon á fronte, acudiron á comisión de peticións para impedir que a Unión Europea investigue esta situación", afirma.

Pola súa banda, Senra secundou as denuncias e profundou en que "a eucaliptización e o abandono do medio rural —en gran parte vinculado ao tipo de medidas que impulsa a Política Agraria Común— pon en risco os montes" de Galicia.

Subliñou que "está amplamente demostrado que onde hai agricultores e animais pacendo e limpando os montes, o lume, se prende, non avanza".