A Xunta estuda esixir na matrícula para garderías ter o calendario de vacinas completo
As autoridades galegas ven nesta posibilidade que se fomente a concienciación dos pais sobre a importancia da vacinación en nenos.
Por Europa Press / Redacción | SANTIAGO DE COMPOSTELA | 25/02/2019 | Actualizada ás 12:23
A Consellería de Política Social está a valorar a posibilidade de incluír como requisito de matrícula na próxima resolución de acceso á súa rede de gardarías 'A Galiña Azul' a esixencia de que os nenos teñan as vacinas "ao día" para obter unha praza.
Así o confirmaron fontes de Política Social, que explicaron que esta esixencia é unha posibilidade que se está analizando e que podería estar na resolución de matrícula para o próximo curso, que sairá publicada a mediados do mes de marzo.
A idea é colaborar na "concienciación" dos pais sobre a importancia da vacinación dos nenos, non só para protexer a súa propia saúde, se non en favor tamén da saúde "dos fillos dos demais", a través da protección de grupo.
Política Social lembrou que as taxas de vacinación entre os nenos galegos son xa moi altas e, de feito, Galicia é unha comunidade "modélica" neste ámbito. No entanto, e dada a implicación da Consellería de Sanidade na concienciación dos pais neste parámetro e contra o chamado movemento 'antivacunas', o departamento que xestiona a rede de escolas infantís considera necesario que constitúa unha liña de actuación da Xunta no seu conxunto.
PODERÍA ESTAR XA O PRÓXIMO CURSO
Se se optase finalmente por esta esixencia, aínda en estudo, a intención de Política Social sería incorporala á propia resolución de matrícula para o próximo curso, que se publicará a mediados do mes de marzo.
A proposta, que avanza este luns o diario La Voz de Galicia, fai referencia ao calendario vacunal oficial, que se esixiría que os nenos tivesen "ao día", aínda que de forma flexible no caso de que exista algún atraso na aplicación dalgunha vacina por motivos xustificados.
O calendario vacunal oficial en España está recomendado para todos os nenos, aínda que non é obrigatorio. No entanto, en casos de centros privados, algúns xa aplicaron noutros puntos de España esixencias de vacinación avaladas polos tribunais.
Do mesmo xeito, en España existen outras comunidades, como Castela e León, que piden a presentación da cartilla á hora de facer a solicitude. No caso de Galicia, esta esixencia abarcaría inicialmente só aos centros da rede pública da Galiña Azul.
