Ratificadas as condicións salariais dos traballadores das auxiliares nos estaleiros públicos de Ferrol

Representantes das empresas auxiliares que operan nos estaleiros públicos de Navantia e representantes sindicais asinaron un acordo de ratificación das condicións salariais dos operarios que realizan o seu labor nos estaleiros de Fene (A Coruña) e Ferrol.

A firma do acordo realizouse na mañá deste martes na sede da Facultade de Ciencias do Traballo de Ferrol, pertencente á Universidade da Coruña (UDC), coa presenza e mediación de Verónica Martínez Barbero, presidenta de Consello Galego de Relacións Laborais (CGRL). Participaron na mesma os integrantes da recentemente constituída Asociación de empresas do sector naval público na ría de Ferrol e representantes dos sindicatos CIG, CC.OO., UGT e MÁS.

Segundo este acordo, todos os operarios que traballen nas instalacións destes estaleiros "recibirán un plus non consolidable" e que será de aplicación só nos estaleiros de Navantia na ría de Ferrol.

Ademais, este acordo, que xa se está aplicando, "gozará de ultraactividade no convenio provincial do sector siderometalúrxico". Este plus "diferenciarase por categorías, así como por tipos de actividade da empresa, ben sexan do ramo de aceiros ou de pintura e servizos", cun aumento nas mesmas "na porcentaxe no que se incrementen o resto de conceptos económicos do convenio colectivo". Así mesmo, créase unha comisión de seguimento.

En canto ás táboas, en aceiros, os pluses mensuais van desde os 547,29 euros que percibirá un operario oficial de primeira; pasando polos 227,19 dun oficial de segunda; os 152,20 dun oficial de terceira; así como os 75,60 euros dun especialista.

En canto ás empresas dos ramos de pinturas e servizos, un oficial de primeira cobrará un plus mensual de 227,63 euros, un oficial de segunda incrementará o seu soldo en 183 euros, mentres que un oficial de terceira farao en 141,91 e un especialista en 74 euros.