Investigados por golpear con estacas varios cabalos en Ourense
Trátase de tres pontevedreses que, ao parecer, se desprazaron ata o colexio de Avión, onde estaban os équidos. Un dos animais morreu por mor das lesións.
Por Europa Press / Redacción | OURENSE | 06/03/2019 | Actualizada ás 12:15
A Garda Civil investiga por un delito de maltrato animal a tres pontevedreses acusados de golpear con estacas a catro cabalos —un dos cales morreu—. O suceso ocorreu nas inmediacións dun colexio do municipio ourensán de Avión.
Segundo informou o instituto armado, os axentes do Seprona tiveron coñecemento dos feitos, ocorridos en decembro de 2018 grazas ao testemuño de varios veciños. Despois de iniciar unha investigación, o Seprona constatou que un grupo de persoas —residentes na provincia de Pontevedra— viaxou en dous vehículos e un remolque ata Avión, onde presuntamente golpearon brutalmente os cabalos.
Os équidos estaban dentro do recinto do colexio público e un deles morreu por mor das lesións sufridas.
Tras tomar declaración en calidade de investigados a tres integrantes do grupo por un delito de malos tratos animais, a Garda Civil remitiu as dilixencias ao Xulgado de Primeira Instancia e Instrución de Ribadavia.
