As exportacións galegas arrincan o ano cun descenso do 26,2%, mentres as importacións aumentan un 12,4%
Galicia encabeza as caídas por CC.AA., por diante de Baleares (-18,8%) e Canarias (-12,5%) e sitúa o seu déficit comercial en 339,9 millóns
Por Europa Press / Redacción | Santiago de Compostela | 21/03/2019 | Actualizada ás 11:16
As exportacións galegas arrincaron 2019 cun descenso do 26,2% en xaneiro en relación co mesmo mes do ano anterior, ata situar o seu valor en 1.541 millóns de euros. Mentres, as importacións incrementáronse un 12,4%, ata 1.880 millóns, o que deixa o saldo da balanza comercial nun déficit de 339,9 millóns (-182,2%).
As exportacións reduciron un 2,4% a súa contribución e quedaron nun 6,8% do total, mentres que as importacións repuntaron un 0,8%, ata o 7%. Así o reflicte o informe do Ministerio de Industria publicado este xoves, que establece que en Galicia as principais exportacións proviñeron dos sectores de manufacturas de consumo (26,8% do total, diminuíron un 45,7% interanual), bens de equipo (18,6% do total, incrementáronse un 14,7% interanual) e sector automóbil (15,9% do total, reducíronse un 32,2% interanual).
No conxunto estatal, o déficit comercial situouse en 4.483 millóns de euros en xaneiro, o que supón un incremento do 13,9% respecto ao mesmo mes do ano anterior, despois de que as exportacións caesen o primeiro mes do ano un 1,3%.
A pesar desta caída, as vendas españolas ao exterior sumaron 22.525 millóns en xaneiro, o segundo maior valor para este mes da serie histórica tras xaneiro de 2018, mentres que as importacións incrementáronse un 0,9%, ata os 27.009 millóns de euros.
A taxa de cobertura (o cociente entre exportacións e importacións) situouse no 83,4%, fronte ao 85,3% de xaneiro de 2018. En termos de volume, as exportacións descenderon un 2,2%, xa que os prezos, aproximados polos índices de valor unitario, creceron un 0,8%; mentres que as importacións incrementáronse un 1,1%, pois os prezos caeron un 0,2%.
O saldo non enerxético arroxou un déficit de 1.880 millóns de euros, superior ao déficit de 1.124,4 millóns rexistrado no mesmo período do ano anterior, e o déficit enerxético diminuíu un 7,4%, ata os 2.603 millóns, por baixo dos 2.811 millóns dun ano antes.
A caída das exportacións españolas en xaneiro do 1,3% contrasta co aumento do 1,7% en Alemaña, do 2,9% en Italia e do 5,2% en Francia, así como a alza do 2,2% na UE e do 2,4% na zona euro. En Reino Unido tamén caeron (-1,7%). Fóra da UE, incrementáronse as exportacións en China (+8,5%) e baixaron en Xapón (-8,4%).
