O viveiro da Cámara de Comercio de Santiago, o mellor do Estado segundo un estudo
A aceleradora ViaGalicia, de Nigrán (Pontevedra), sitúase como a mellor do país
Por E.P. | SANTIAGO DE COMPOSTELA | 21/03/2019 | Actualizada ás 13:43
O viveiro da Cámara de Comercio de Santiago de Compostela sitúase este ano, igual que o anterior, como o mellor centro para a creación de empresas en España, segundo o ranking 2019/2020 realizado pola Fundación de Caixas de Aforros (Funcas).
Segundo relata a organización nun comunicado, o informe foi presentado este xoves polo seu coordinador e responsable de emprendemento na Universidade Rey Juan Carlos de Madrid, Francisco Blanco, no marco da xornada 'Os servizos que prestan os viveiros e aceleradoras de empresas en España'. Durante o acto, entregáronse os premios Funcas aos primeiros clasificados no ranking.
Na segunda posición atópase o Centro de Empresas La Curtidora, de Avilés e o terceiro posto ocúpao a Fundación CEL Iniciativas por Lugo. Ademais, ViaGalicia, de Nigrán (Pontevedra), situouse como a mellor aceleradora do país. Séguena Lanzadera, de Valencia, e Aceleradora Agroalimentaria Orizont, de Tudela (Navarra).
SECTOR DO EMPRENDEMENTO
A clasificación de Funcas busca "pór en valor" os puntos fortes e débiles do sector do emprendemento en España. O estudo analiza a situación actual dos viveiros de empresas e das aceleradoras do país como "catalizadores" do desenvolvemento do tecido empresarial. O contexto no que se sitúa está definido, segundo explica Funcas, por unha actividade emprendedora que se converteu nun instrumento "dinamizador" da economía e "peza chave" para a innovación, a competitividade e o crecemento.
O informe recolle 549 viveiros de empresas no país, 72 máis que na anterior edición. Das 17 comunidades autónomas, 13 contan con viveiros que se sitúan entre os 30 mellores. Destacan algunhas comunidades como o País Vasco, que conta con cinco dos viveiros con mellores posicións; seguido da Comunidade de Madrid e Cataluña con catro; Galicia e a Comunidade Valenciana con tres; e Murcia e Aragón con dous.
Ademais, Galicia é a que conta con máis postos altos no ranking, co primeiro e terceiro viveiro de empresas de España. O País Vasco é o que presenta un maior número de viveiros no ranking.
