Sanidade presume de que o seu borrador de Atención Primaria "vai por diante" do do Ministerio

O conselleiro de Sanidade, Jesús Vázquez Almuíña, insistiu en que o borrador do novo modelo de Atención Primaria de Galicia "vai por diante" do documento do Ministerio de Sanidade, Consumo e Benestar Social.

En resposta a senllas interpelacións debatidas de forma acumulada no Parlamento de Galicia e formuladas polos deputados Julio Torrado (PSdeG) e Eva Solla (En Marea), o conselleiro referiuse a temas como a historia clínica electrónica compartida, o seguimento dos pacientes por telemonitorización, a interconsulta non presencial ou a consulta telefónica.

Segundo indicou, o documento presentado polo Executivo estatal presenta similitudes de estrutura co borrador galego no que se refire á definición de estratexias, obxectivos e accións a curto, medio e longo prazo, mais valorou que o texto da Consellería vai un paso máis alá ca o outro.

No primeiro punto -o referido ás estratexias- ambos documentos coinciden en canto a política orzamentaria e de recursos humanos; na coordinación da atención primaria con outros ámbitos asistenciais, servizos e institucións, e no fomento da formación e da investigación en atención primaria. "Galicia, ademais, inclúe unha liña estratéxica de creación de equipos de Atención Primaria na que se definan novos roles, que non recolle o Ministerio", indicou o conselleiro, que tamén destacou a proposta galega de mellora da xestión da demanda non programada ou urxente e a dispoñibilidade dun plan de necesidades adecuado á carteira de servizos de cada centro.

En canto aos obxectivos, Almuiña incidiu en que o documento do Ministerio ten 23 mentres que o borrador do modelo galego ten 45. "O do Ministerio ten 19 accións a curto prazo mentres que o do Servizo Galego de Saúde ten 75. A medio prazo hai 70 accións no documento do Ministerio, fronte a 60", apuntou.

INTERVENCIÓNS DOS GRUPOS

O conselleiro de Sanidade destacou estas medidas e fixo estas comparacións en resposta ás preguntas formuladas tanto por Eva Solla (En Marea) como por Julio Torrado (PSdeG). Así, en primeiro lugar, a parlamentaria rupturista instoulle a aclarar na Cámara o orzamento que contempla a Xunta para a posta en marcha destas medidas.

Ademais, afeoulle que non se sente a negociar cos profesionais en folga. "Cando un quere chegar a un acordo senta a negociar e con quen ten que sentar é co comité de folga", manifestou Eva Solla.

Pola súa banda, o parlamentario socialista Julio Torrado volveu pedir o cesamento de Almuiña polo conflito aberto na sanidade pública "con dimisións de xefes de servizos, ameazas de folga, conflito nos PACs e a procura de enfrontamento entre os colectivos".

Torrado denunciou o "deixamento" do Goberno galego, "máis ocupado en presumir que en xestionar" as consecuencias do "recorte de 188 millóns de euros e a supresión de 1.249 prazas de profesionais da sanidade desde 2009". "No canto de dimitir provoca cesamentos", denunciou.