Por E.P. | SANTIAGO DE COMPOSTELA | 28/03/2019 | Actualizada ás 16:28
O Partido Popular convidou a Pontevedra ao economista Daniel Lacalle, considerado o 'gurú económico' de Pablo Casado e número 4 da lista do PP madrileña. O obxecto da visita será abordar o tema da creación de emprego.
Será no marco do Foro PontEmplea organizado co obxectivo de "escoitar" a percepción que teñen empresarios, representantes da patronal e expertos sobre a economía. Ademais de Lacalle, este foro contará coa participación do secretario xeral de ANFACO, Juan Manuel Viéites; a empresaria do sector vitivinícola, Marisol Bueno; e o presidente da CEP, Jorge Cebreiros.
O candidato popular á Alcaldía, Rafa Domínguez, e a secretaria local dos populares, Pepa Pardo, presentaron este xoves esta iniciativa que consistirá en dúas xornadas, unha o xoves 4 de abril e outra o xoves 11 de abril, ambas no Hotel Rías Baixas de Pontevedra e abertas á cidadanía.
O presidente local dixo que a "prioridade absoluta é a xeración das condicións necesarias para a creación de postos de traballo en Pontevedra", xa que, segundo dixo, os datos económicos neste municipio son "preocupantes" e "non existen oportunidades de futuro" para os pontevedreses.
O candidato popular expón no seu programa electoral unha serie de medidas: redactar un Plan Estratéxico de Emprego; a posta en marcha dunha "revolución fiscal" que permita unha "baixada xeneralizada de impostos"; a elaboración dunha novo PXOM ou a creación de máis chan industrial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.