Este sábado abre o prazo para solicitar axudas para producións galegas de teatro, danza, circo ou maxia

O Diario Oficial de Galicia (DOG) publicou este venres a convocatoria de axudas da Axencia Galega de Industrias Culturais (Agadic) destinadas a producións galegas de teatro, danza, novo circo ou maxia que se estreen entre o 1 de abril do presente ano e o 31 de marzo de 2020. O prazo para solicitalas permanecerá aberto desde este sábado ata o próximo 6 de maio.

Segundo informa a Xunta, estas subvencións supoñen un desembolso total de 650.000 euros. A principal novidade da convocatoria deste ano é a reformulación da clasificación dos proxectos, de modo que a primeira modalidade pretende apoiar as compañías de nova creación, a segunda os espectáculos de teatro, novo circo e maxia, e a terceira os de danza e artes do movemento.

Ademais, a convocatoria reforza os mecanismos de discriminación positiva para as propostas coreográficas, ás que destina 110.000 euros por producións que non excedan os 50.000 euros e cun máximo de 37.500 euros por empresa adxudicataria.

Para espectáculos de teatro, novo circo e maxia, están reservados 470.000 euros se non superan os 80.000 euros, cunha contía máxima por beneficiario de 60.000 euros. Para estas dúas modalidades, o máximo subvencionable é o 75 por cento da contía do proxecto.

Por último, o orzamento destinado a empresas de nova creación é de 70.000 euros, que serán distribuídos entre proxectos que non superen os 20.000 euros, cun límite de 18.000 euros por adxudicación e do 90 por cento do orzamento da proposta.

Nesta última categoría redúcese de cinco a tres anos a antigüidade máxima esixida ás empresas e sinálase que, como mínimo, o 50 por cento do equipo artístico debe estar composto por menores de 35 anos.

Premios de Teatro María Casares | Fonte: Arquivo Galicia Confidencial