O nacionalismo galego dívidese en tres coalicións nas Europeas
Lidia Senra estará no número dous da lista de Compromiso por Europa, Ana Miranda de catro en Agora Repúblicas e Juan Carlos Piñeiro de tres na de Coalición por unha Europa Solidaria.
Por Europa Press / Redacción | Santiago de Compostela | 14/04/2019 | Actualizada ás 21:50
Doce coalicións presentáronse ante a Xunta Electoral Central para as eleccións europeas do próximo 26 de maio, entre as que destaca a división de Equo, que se presentou tanto en coalición con Unidas Podemos como con Compromís. A coalición valenciana concorrerá como Compromiso por Europa, en coalición con ata 18 partidos, entre os que se atopan Més per Mallorca, En Marea, Nova Canarias, Equo ou a Chunta Aragonesista.
Precisamente, nunha rolda de prensa convocada o venres en Santiago de Compostela, o portavoz de En Marea, Luís Villares, informou de que a galega Lídia Senra ocuparía o segundo posto nesta candidatura.
Pola súa banda, unha facción de Equo decidiu ir con Unidas Podemos Cambiar Europa, xunto con Podemos, Esquerda Unida, Catalunya en Comú e Barcelona en Comú. Nesta lista non estará, finalmente, Anova que tampouco se presentou ás Xerais por non aceptar Podemos e EU unha candidata para liderar a lista por Pontevedra que, finalmente, foi para a ferrolá de Esquerda Unida Yolanda Díaz.
O independentismo catalán dividiuse tamén en distintas formacións. Por unha banda, ERC, Bildu BNG e partidos asturianos, canarios e aragoneses uníronse baixo a denominación Agora Repúblicas. Nesta candidatura, a eurodeputada Ana Miranda quedou relegada ao cuarto posto da lista. Outra será a integrada polo PDeCAT, Convergència e JuntsXCat que formaron a coalición Junts.
Ademais, o PNV, Coalición Canaria, Compromiso por Galicia, Agrupación Atarrabia, Proposta per lles Illes Balears e Democrates Valencians acudirán xuntos ás eleccións europeas baixo a denominación Coalición por unha Europa Solidaria. Neste caso, o líder de CxG, Juan Carlos Piñeiro irá de número tres nesta lista.
COMUNISTAS, PIRATAS E XUBILADOS
Entre as candidaturas presentadas, diversas formacións de extrema dereita uníronse baixo a coalición ADÑ. Trátase dos partidos euroescépticos Alternativa Española, Falange Española das Jons, Democracia Nacional e La Falange, que se uniron baixo a coalición ADÑ, coa lema 'Identidad Española'.
Parte da coalición de Recortes Cero, que tamén se presenta ás xerais de abril, e que nesta ocasión agrupa aos Verdes-Grupo Verde, Unificación Comunista de España e Grupo Verde Europeo, acudirá aos comicios europeos como Recortes Cero-LV-GVE.
Os partidos comunistas dos Pobos de España, do Poble de Catalunya e do Pobo Andaluz presentarase como Comunistas, ao mesmo tempo que distintos partidos 'piratas' de Cataluña conformaron a súa propia coalición, Pirates de Catalunya-European Pirates.
O resto de coalicións son: Os Verdes (Gira Madrid e Derechos Ciudadanos); Centristas por Europa (Coalición de Centro Democrático, Lliures, Unidos para a Independencia da Xustiza e Centrados); e Xubilados por Europa (Xubilados pola Futuro Dignidade e Democracia, Demócrata Social Xubilados Europeos e Unidade de Centro).
As LISTAS, ANTES DO 22 DE ABRIL
Nas eleccións do próximo 26 de maio deberán elixirse 54 deputados ao Parlamento Europeo (con cinco máis na reserva para cando se produza o Brexit), ademais de 715 deputados autonómicos de doce comunidades e 67.319 concelleiros de máis de 8.000 municipios.
Unha vez concluído o prazo para formar coalicións, as formacións políticas terán que presentar as súas candidaturas entre os días 17 e 22 de abril, e dous días despois, o mércores 24 de abril, as listas europeas serán publicadas no Boletín Oficial do Estado (BOE). Despois as xuntas electorais revisarán as candidaturas para proceder á súa proclamación e as candidaturas definitivas ao Parlamento Europeo volverán ao BOE o martes 30 de abril.
A campaña electoral comezará ás cero horas do venres 10 de maio e concluirá ás doce da noite do día 24, dúas semanas despois.
