VOTA | Debe Feijóo substituír a Pablo Casado á fronte do PP?
Os pésimos resultados do Partido Popular volven colocar ao presidente da Xunta no foco como posible salvador do partido.
Por Galicia Confidencial | Santiago de Compostela | 29/04/2019 | Actualizada ás 16:02
Os resultados das eleccións xerais celebradas este domingo deixan un PP tocado e case afundido. A caída é brutal: 71 escanos menos, de 137 a 66. E tres millóns e medio de votos perdidos respecto aos anteriores comicios.
O presidente do Partido Popular, Pablo Casado, logrou en nove meses —desde que sucedeu a Mariano Rajoy— levar o seu partido a mínimos históricos que o deixan ao bordo do abismo. Aínda que Casado se aferra ás eleccións municipais e europeas de maio para tentar salvar a súa cabeza, o certo é que en sectores amplos do partido existe malestar pola situación e o nome de Alberto Núñez Feijóo volve emerxer como salvador do partido.
Tras renunciar o pasado ano a presentarse ás primarias do PP, escudándose en que ten un "compromiso con Galicia", agora ese "compromiso" podería rompelo se no partido crecen as voces a prol dunha profunda reforma ideolóxica do PP, que con Casado se radicalizou, con propostas e mensaxes reaccionarias, propias da ultradereita, para competir con Vox.
