Unhas 100 toneladas de lixo quedan sen recoller na Coruña por incidencias cos camións
Miguel Anxo Sánchez, secretario xeral do Sindicao de Traballadores de Limpeza (STL) sinala que foi pola existencia de "fallos graves" nos camións da empresa Cespa e non descarta que fora intencional por parte da patronal.
Por Europa Press / Redacción | A CORUÑA | 02/05/2019 | Actualizada ás 13:50
Unhas 100 toneladas de lixo quedaron sen recoller na cidade da Coruña por incidencias cos camións, segundo asegurou o secretario xeral do Sindicato de Traballadores de Limpeza (STL) despois de que desde a madrugada do luns ao martes quedasen xa residuos sen retirar.
Miguel Anxo Sánchez volveu a denunciar a existencia de "fallos graves" nos camións que emprega a empresa Cespa, concesionaria do servizo de recollida de lixo, para este traballo. "Once camións non puideron saír por distintos fallos graves", expuxo o secretario xeral do STL en alusión a unha frota integrada por un total de 27 vehículos. Isto provocou que ao redor de 100 toneladas, "entre 80 e 110", apuntou, quedasen sen recoller esta pasada noite.
Sobre esta situación, expuxo que os traballadores tratarán de facer "un esforzo" para lograr "tentar limpar a cidade nos próximos días". "Pero a empresa, no canto de solucionar os problemas, ameaza con saír con eles", dixo respecto dos camións dos que os traballadores denuncian a existencia de fallos que non garantirían a súa seguridade.
DENUNCIA
Mentres, Miguel Anxo Sánchez explicou que constataron que os sistemas de seguridade dalgúns camións, en concreto as fotocélulas antiatrapamiento, "foron anulados deliberadamente por parte da patronal".
"A pregunta é con que obxectivo", sinalou o representante sindical, que non descartou que sexa para evitar os custos en caso dun fallo. "Cada fotocélula costa 600 euros se se estraga", explicou. Por este motivo, avanzou que acudirán este venres á Inspección de Traballo e que proximamente presentarán denuncia ante o xulgado.
