Galicia terá como festivos propios en 2020 os días de San Xosé e San Xoán, ademais do 25 de xullo

A Xunta de Galicia propuxo o 19 de marzo e o 24 de xuño, días de San Xosé e de San Xoán, como festivos propios para o ano 2020, ademais do tradicional 25 de xullo, Día de Galicia. Así se establece na proposta de calendario laboral de 2020 que se trasladou ao Consello da Xunta deste xoves.

A normativa estatal, fixada polo Real Decreto 2001/1983, establece 14 festivos anuais de ámbito estatal non recuperables, remunerados e de carácter obrigatorio.

Destes 14 festivos, dous son elixidos por cada concello. Dos 12 restantes, nove son de carácter obrigatorio e non substituíbles, a non ser que coincidan en domingo. Trátase do 1 de xaneiro, o Venres Santo (10 de abril en 2020), o 1 de maio, o 15 de agosto, o 12 de outubro, o 1 de novembro, o 6 e o 8 de decembro e o 25 de decembro.

Pero en 2020 hai dous festivos estatais que coinciden en domingo, o 1 de novembro, que é o día de Todos os Santos, e o 6 de decembro, Día da Constitución. Por iso, estas dúas xornadas serán substituídas en Galicia por outros dous días festivos.

Ademais, as comunidades autónomas tamén poden substituír outro tres festivos de carácter estatal, aínda que no caso de Galicia non se realicen modificacións. Desta forma, mantense o 6 de xaneiro, día de Reyes, que só se cambia se coincide en domingo e o Xoves Santo (que en 2020 se celebrará o 9 de abril) e que tampouco se varía tradicionalmente.

Ademais, dáselle opción ás comunidades para que elixan entre o 19 de marzo e o 25 de xullo e, neste caso, Galicia sempre escolle o 25 de xullo por ser o Día Nacional de Galicia, como quedou establecido polo Decreto 8/1978.