Por Europa Press / Redacción | SANTIAGO DE COMPOSTELA | 27/05/2019 | Actualizada ás 15:21
As bases de Compostela Aberta decidirán, previsiblemente a próxima semana, o futuro do rexedor santiagués en funcións, Martiño Noriega, quen puxo o seu cargo na corporación da capital galega a disposición da asemblea da marea compostelá tras perder o bastón de mando que ostentou no últimos catro anos.
A derrota da lista de Noriega, que perde uns 7.000 votos e queda coa metade da representación obtida en 2015 --pasa de dez a cinco edís--, provocou que o aínda alcalde decidise someter a opinión das bases a súa continuidade no Concello.
Así o comunicou a través dunha mensaxe publicada nas súas redes sociais na madrugada do luns, horas despois de confirmarse a perda da alcaldía en favor do socialista Xosé A. Sánchez Bugallo, a quen Noriega felicita polo resultado. "O noso obxectivo era continuar a liderar esta nova etapa da cidade. Resulta evidente que non fumos quen. O que votáchedes, ben votado está.", sinala.
"Eu pola miña banda, máis aló da miña decisión persoal, porei o meu cargo na institución a disposición da Asemblea de Compostela Aberta", engade a continuación Noriega nunha mensaxe que vai na liña do expresado ao longo da campaña, durante a cal deslizara que non continuaría no Concello en caso de perder a alcaldía.
Así as cousas, fontes de Compostela Aberta confirmaron que a próxima semana será convocada unha asemblea na que, aínda que non está previsto a inclusión dun punto específico sobre o futuro de Noriega, esta será unha das principais cuestións a debate.
Antes, a coordinadora de CA reunirase nos próximos días para avaliar os resultados, que deixan á marea compostelá como terceira forza despois de ser o partido máis votado fai catro anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.