‘Influencers’ do mundo do viño visitan Valdeorras
Un grupo de bloggers, influencers e xornalistas especializados en viños visitarán esta fin de semana, 1 e 2 de xuño, o territorio amparado convidados polo Consello Regulador.
Por X.M. Fernández | Vilamartín de Valdeorras | 29/05/2019 | Actualizada ás 10:20
Por segundo ano consecutivo, a D.O. Valdeorras organiza un encontro de expertos no mundo do viño que se desprazarán a este territorio amparado para coñecer de primeira man a potencialidade da terra, as súas características e os valores diferenciais dos brancos e dos tintos desta comarca.
Segundo destaca o presidente do Consello Regulador, José Luis García Pando, “tras o éxito da iniciativa impulsada o ano pasado, decidimos volver organizar un encontro destas características porque consideramos que esta acción promocional ten un valor de gran retorno e contribúe moi directamente ao fortalecemento da marca Valdeorras”.
Así, pois, esta vindeira fin de semana, 1 e 2 de xuño, coincidirán en Valdeorras bloggers, influencers e xornalistas especializados chegados de diferentes lugares do país como Vigo, Ponferrada, Madrid ou Barcelona. Os 'prescritores' visitarán viñas emprazadas en diferentes puntos da comarca para coñecer por eles mesmos as particularidades do territorio, probarán diferentes seleccións de brancos e tintos da DO e visitarán tamén enclaves de interés turístico como o Mosteiro de Xagoaza.
