Protesta fronte á Deputación de Ourense para reclamar a "saída dos Baltar"
Un cento de persoas concentráronse para pedir que o PP non siga gobernando a provincia ourensá, tras perder a maioría absoluta.
Por Europa Press / Redacción | SANTIAGO DE COMPOSTELA | 07/06/2019 | Actualizada ás 21:10
Ao redor dun cento de persoas concentráronse na tarde deste venres fronte á sede da Deputación de Ourense para reclamar a "saída dos Baltar" do goberno provincial tras a perda da maioría absoluta por parte do PP.
Baixo o lema 'Botemos os Baltar', a protesta, realizada en réxime de "autoconvocatoria", foi secundada por unhas cen persoas de todas as idades que se concentraron nun lateral do edificio que acolle a sede do goberno provincial.
A partir das 20,00 horas comezou a chegar a xente ao lugar da concentración. No edificio situado fronte á Deputación colgaba unha pancarta na que se podía ler 'Ctrl+Baltar+Supr'.
A acción prodúcese en plenas negociacións para configuración do goberno provincial, marcadas pola perda da maioría absoluta do Partido Popular ourensán que lidera José Manuel Baltar.
