Socialistas e BNG intensifican as negociacións para a formación de gobernos para desbancar ao PP

Os socialistas e os nacionalistas acordaron este xoves manter o criterio e a vontade política de ambas as formacións de facilitar gobernos municipais alternativos ao Partido Popular en todos os concellos do país no que esa opción sexa posible. Segundo explicou o Bloque nun comunicado, a poucas horas de que se conformen os gobernos municipais, as comisións negociadoras do PSdeG e do BNG ratificaron este acordo que permitirá ter gobernos de esquerdas en moitas cidades e municipios.

Deste xeito, sinalou que buscan "facilitar a renovación dos executivos locais a favor dunha proposta en clave nacionalista e de progreso" ou "ben dando continuidade a un goberno municipal con estes mesmos criterios políticos". Así mesmo, a formación que lidera Ana Pontón destacou o seu avance social tras as eleccións do 26 de maio, das que, conforme indicou, o Bloque sae como "terceira forza política" o que lle permitirá gobernar en "29 municipios que suman unha poboación de case 300.000 galegos".

Ademais, tras a última cita coas urnas, os nacionalistas volverán ter representación en todas as grandes cidades de Galicia. Todo iso, indicou o BNG, "mantendo a tendencia á alza que evidencia o cambio do ciclo electoral que culminará nas eleccións galegas do próximo ano".

O Bloque destacou que fará todo o posible para materializar o mandato da cidadanía e, "desde o diálogo e a reciprocidade, facilitar unha alternativa á dereita e pór en marcha políticas transformadoras desde o ámbito municipal". "E, de face ao futuro, o BNG vai a trabar desde os concellos, tanto desde o goberno como desde a oposición, a favor de construír esoutra Galicia posible que xa se está desenvolvendo nos pobos e nas cidades lideradas pola formación nacionalista", indicou.

Rubén Cela, BNG | Fonte: EP