Por Europa Press / Redacción | SANTIAGO DE COMPOSTELA | 16/06/2019 | Actualizada ás 19:30
A compañía de Enerxía e Celulosa Ence asegurou este domingo que a súa fábrica situada na ría de Pontevedra "cumpre de maneira rigorosa a máis esixente normativa ambiental", tanto española como europea.
Segundo a empresa, as súas instalacións "non afectan de ningún xeito a calidade da auga" da ría. Ademais, indicou que "non existe outro emprazamento viable nin economicamente nin tecnicamente en Galicia para recolocar a planta de Lourizán".
Todo iso, tras a multitudinaria manifestación que este domingo organizou a Asociación pola Defensa da Ría (APDR), na que milleiros de persoas percorreron as rúas de Marín e Pontevedra para esixir o peche da fábrica.
Sobre esta marcha, Ence asegurou que a tamén masiva mobilización a favor da compañía levada a cabo a finais de abril "bateu amplamente" a deste domingo en número de asistentes.
"A pesar dos actos lúdicos e obsequios gastronómicos que esta asociación tivo que utilizar como reclamo na súa convocatoria, a marcha da APDR foi amplamente batida polas preto de 20.000 persoas que o pasado 26 de abril abarrotaron as rúas de Pontevedra e apoiaron masivamente a continuidade da planta de celulosa de Lourizán", destacou Ence en relación á comida organizada na alameda pola APDR.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.