Por Europa Press / Redacción | SANTIAGO DE COMPOSTELA | 25/06/2019 | Actualizada ás 17:54
A alcaldesa de Narón (A Coruña), Marián Ferreiro (TeGa), instou á conselleira de Educación, Carmen Pomar, a que "reabra" a escola de Pedroso, unhas instalacións situadas nunha parroquia do rural deste municipio da comarca de Ferrolterra.
Segundo subliñou, "cúmprense as condicións pactadas e marcadas pola Xunta, co número de matrículas suficientes". O que pide é "que se abre a escola, xa que o que corresponde" ao Consistorio, "o mantemento básico, está realizado".
Así, incidiu en que o Goberno autonómico é o que "pon as regras e agora cúmprense", por iso reclama "que se faga efectiva a reapertura".
Ditas manifestacións realizounas a rexedora naronesa nunha concentración ante o edificio administrativo da Xunta en Ferrol, na praza de España, na que se deron cita parte do goberno de Narón, así como veciños da parroquia afectada e pais e nais.
Ferreiro tamén denunciou a imposibilidade de manter unha entrevista coa Conselleria de Educación para abordar "este e outros asuntos, xa que hai mais asuntos para tratar con esta responsable do Goberno da Xunta".
"Desde a súa toma de posesión decidimos dar un tempo prudencial e estimamos que nos corresponde que nos reciba, xa que somos a oitava cidade de Galicia", incidiu, antes de trasladar que o que quere é "ofrecer mesmo asinar convenios para o arranxo dos distintos centros escolares". O Concello "quere pór diñeiro", e nin aínda así é recibido, criticou.
O presidente da federación de Anpas das escolas públicas de Ferrolterra, Javier Sánchez, asegurou que "a Consellería de Educación mente" e rexeitou "calar", ao esixir "respecto e que se cumpra a palabra dada". Así, apuntou que este colectivo aposta "polo ensino público na zona rural e desde a Consellería o que se está facendo é política para pechar estas escolas".
Ao seu xuízo, é "un claro exemplo" o de Pedroso, ao contar co mínimo de cinco alumnos que esixen, "pero a día de hoxe a unidade segue pechada e decidiron escolarizar os nenos noutro lado".
DOTACIÓN DUN PROFESOR
Como portavoz dos pais e nais afectados interveu Karina Rosario, que lembrou que levan "ano e medio loitando para que reabran o Colexio Rural Agrupado (CRA) de Pedroso" e que "nunha primeira instancia" trasladan "que os nenos son suficientes e agora vese que non é así".
Solicitoulle unha resposta a Carmen Pomar, para que diga "algo claro" e "deixe de dar longas, a pesar de que a natalidade está a crecer en Pedroso".
Tamén destacou que "este colexio levaba máis de 60 anos aberto, está en perfectas condicións para empezar a funcionar e só fai falta un profesor, que é o que ten que pór a Xunta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.