O 82% das 8.541 vivendas de uso turístico galegas pertencen a donos cun único inmoble no mercado

O 82% das 8.541 vivendas de uso turístico galegas pertence a "pequenos propietarios" cun único inmoble no mercado, segundo destacou este luns o conselleiro de Cultura e Turismo, Román Rodríguez, nunha rolda de prensa na que fixo balance da actividade desenvolvida por este tipo de aloxamentos.

Neste acto tamén estivo presente a directora da Axencia Turismo de Galicia, Nava Castro, quen explicou que as vivendas de uso turístico son a "principal novidade" da nova normativa autonómica, que entrou en vigor hai dous anos, e esta categoría correspóndese a aqueles aloxamentos que poden alternar un uso turístico nuns meses do ano e un uso residencial noutros.

Entre as cifras expostas, o concelleiro subliñou o feito de que o 82% dos galegos que comercializan unha vivenda de uso turístico contan cun único inmoble en aluguer. Esta cifra aumenta ata o 93% no caso de arrendatarios cunha ou dúas vivendas. Así, só un 7% dos propietarios dispoñen de máis de dous apartamentos no mercado.

"En Galicia temos un modelo propio, diferentes ao doutras comunidades autónomas e que expón que as vivendas de uso turístico non son propiedades de grandes empresas. Na súa inmensa maioría pertencen a pequenos propietarios", indicou Rodríguez, tras indicar que "as cifras confirman que a Xunta acertou cando hai dous anos decidiu regular as vivendas de uso turístico con sentidiño e de maneira eficaz", o que permite tanto ás persoas que ofrecen estes servizos como aos que os contratan "que poidan facelo con garantías e con total seguridade xurídica".

"GRAN DISPERSIÓN"

A análise efectuada polo Goberno galego mostra a dispersión na distribución da propiedade das vivendas de uso turístico, con ata 6.300 propietarios, así como a "gran dispersión" na distribución deste tipo de aloxamentos.

Así, o 47% das vivendas de uso turístico atópase na provincia de Pontevedra, con localidades como Sanxenxo (1.629), que se sitúa como o municipio no que hai máis de toda Galicia, co 19% do total. A esta provincia séguea A Coruña, cun 37% do total, mentres que Lugo (13%) e Ourense (3%), sitúanse con cifras inferiores.

Se se comparan as sete grandes cidades galegas, Santiago sitúase á cabeza, con ata 566 vivendas de uso turístico, seguida por Vigo (310), A Coruña (296), Pontevedra (122) e Ourense (106). Con todo, Lugo (80) e Ferrol (37) quedan por baixo do centenar.

PREZO DO ALUGUER

Así mesmo, o Executivo autonómico destacou que o marco creado en Galicia "permitiu regular en dous anos 8.541 vivendas de uso turístico", o que supón unha "pequena parte" do parque de vivendas da comunidade que, segundo o último censo do Instituto Nacional de Estatística (INE) é de 1,6 millóns de vivendas.

"Por tanto, só o 0,53% terían como finalidade o uso turístico nestes momentos. É unha cifra inferior á de comunidades como Cataluña, que conta con ao redor de 80.000, das que máis de 18.000 operan só na cidade de Barcelona", indicou o titular de Cultura e Turismo.

Preguntado por unha posible influencia deste tipo de vivendas nos prezos á alza do aluguer, Nava Castro indicou que "os alugueres están a subir en todo o Estado" xa que "España viña dunha época de crise económica". Tamén Román Rodríguez descartou "achacar toda a situación a este caso en concreto" de vivendas de uso turístico.

INFLUENCIA NO RESTO DO SECTOR

En canto á influencia deste tipo de aloxamentos no resto do sector turístico e hoteleiro, os datos presentados este luns pola Xunta subliñan que as tipoloxías de aloxamento turístico que existían previamente (hoteis, pensións, apartamentos turísticos, cámpings e turismo rural) "están a incrementar o seu volume de viaxeiros".

En concreto, no primeiro cuadrimestre do ano recibiron un 3,2% máis de turistas, que realizaron un 5% máis de pernoctaciones, co que a subida da ocupación por habitación foi do 6,4%. "Falamos sempre dun crecemento en cantidade, pero sobre todo en calidade", recalcou o conselleiro, quen aludiu á mellora dos prezos hoteleiros ou ao aumento da rendibilidade empresarial, dun 7,7%, "ata os mellores niveis alcanzados esta década".

"Por iso, observamos que en Galicia existe unha correcta convivencia entre as vivendas de uso turístico e o resto de tipoloxías de aloxamento, un modelo polo que debemos seguir traballando", declarou Román Rodríguez este luns na rolda de prensa realizada na Cidade da Cultura.

COORDINACIÓN ADMINISTRATIVA

Neste sentido, Rodríguez avanzou a súa vontade de continuar dando pasos, para o que trasladou unha proposta á Federación Galega de Municipios e Provincias (Fegamp) "co fin de facilitar a coordinación das competencias turísticas e urbanísticas exercidas pola administración autonómica e local".

"Temos un permanente contacto cos concellos neste ámbito, dado que cada vez que damos de alta unha vivenda de uso turístico notificámolo cunha comunicación tanto ao propietario como ao concello no que operará", destacou, polo que a Xunta quere ampliar esa colaboración en dúas direccións, de maneira que propuxo á Fegamp "a creación dun marco de colaboración que permita afianzar o modelo".

Da mesma maneira, a Xunta seguirá demandando maior coordinación a nivel estatal neste ámbito. Para iso, reclamou ao Goberno central marcos normativos nos que poder desenvolver as competencias autonómicas con seguridade xurídica, así como a unificación de criterios que permitan dar unha resposta común a unha realidade "dinámica e en constante evolución".

O conselleiro tamén deu conta do labor de inspección desenvolvida nesta área. Tras un período inicial, a Xunta incorporou as vivendas de uso turístico ao seu plan de inspección co resto de opcións de aloxamento e servizos, actuando principalmente de oficio. En total, abríronse 53 expedientes, dos cales 45 foron por realizar este servizo de forma ilegal, sen estar inscritos no rexistro autonómico.

Á esquerda, Nava Castro, no centro, Román Rodríguez.. XUNTA DE GALICIA | Fonte: Europa Press