O colectivo de celadores considera un "éxito" a mobilización mentres o Sergas segue sen comunicarse con eles
Este venres celebráronse concentracións en hospitais de toda Galicia pola perda de prazas da categoría laboral en favor dos PSX.
- Os celadores dos hospitais tamén en loita: "Soamente pedimos que nos deixen traballar"
- A Xunta quítalle importancia á protesta dos celadores: “Hai unha mesa sindical na que se negocia”
Por Brais Nogueira | SANTIAGO DE COMPOSTELA | 12/07/2019 | Actualizada ás 15:12
O colectivo de celadores manifestouse este venres en toda Galicia para protestar pola perda de prazas da súa categoría laboral. A xornada aconteceu tal e como estaba planeada, onde a partir das 12:00 membros deste colectivo concentráronse en diferentes hospitais de Galicia. Ángel Bergueiro, un dos celadores que se manifestaron esta mañá considera que a acción "foi un éxito tendo en conta as circunstancias, xa que son moitas as dificultades que implica abandonar o noso posto de traballo e que moita xente está de vacacións".
"Sabemos que temos moitas persoas que nos apoian que hoxe non puideron estar", continúa Bergueiro. O celador mostrouse satisfeito do número de hospitais que seguiron a iniciativa xa que houbo presenza "incluso no pequeno hospital de Cee". O mércores terán en Santiago de Compostela unha xuntanza a nivel galego para estudar as seguintes mobilizacións.
INACCIÓN DO SERGAS
Bergueiro denuncia que aínda non teñen ningún tipo de comunicación por parte do Sergas a pesar dos seus intentos por contactar, pero que intúen que se están a mover as cousas: "Sabemos que se adiantou a reunión pola Atención Primaria ao día 23. Non podemos asegurar se é por nós, pero o podemos intuír".
O representante do colectivo tamén quere aclarar que aínda que eles fixeron esta mobilización alén dos sindicatos, e ningún caso rexeitan o seu apoio, "todo o contrario". Ademais, tamén quere aclarar que eles non están contra a categoría de PSX "tal e como está aparecendo nalgúns sitios", senón que soamente "queren loitar polo seu traballo".
