A alcaldesa da Coruña comprométese a loitar polo futuro da planta "máis aló de agosto de 2021"

A alcaldesa da Coruña, Inés Rey, trasladou ao comité de empresa de Alcoa o seu compromiso de seguir loitando polo futuro da planta máis aló dos dous anos que garante o comprador. Así llo transmitiu durante un encontro celebrado este mércores en María Pita ao presidente do comité de empresa, Juan Carlos López Corbacho, quen informou de que o próximo 31 de agosto viaxarán a Madrid para constatar a compra de Alcoa.

A alcaldesa destacou que sempre defendeu e pelexou co Goberno de España a viabilidade da fábrica e dos postos de traballo. Ademais, manifestou que tanto ela como a corporación seguirán loitando pola continuidade da empresa máis aló dos dous anos que garante o novo comprador.

"Queremos un proxecto de futuro para a fábrica que asegure os postos de traballo e o sector industrial da Coruña e a súa comarca. Queremos un proxecto a longo prazo por parte de Parter, porque a planta da Coruña é rendible", indicou.

Para iso, indicou que negociará co Goberno de Pedro Sánchez, quen, segundo indicou, "xa manifestou o seu total compromiso coa viabilidade de Alcoa". "Un compromiso que se verá reflectido na aprobación do estatuto electrointensivo que fixará un prezo alcanzable e estable da enerxía eléctrica para que os custos non sexan tan elevados e que dará seguridade ao sector", indicou.

Inés Rey asegurou que o Goberno achegará unha solución definitiva para a continuidade de Alcoa "unha vez que Pedro Sánchez sexa nomeado presidente e retómese o estudo do canon que recollía xa as alegacións presentadas polos traballadores e que está a ser estudado pola asesoría xurídica", indicou.

Por último, pediu a implicación de todas as forzas políticas, do Estado e da Xunta para conseguir un proxecto de futuro para a planta. "Neste tema non hai cores políticas, non hai lugar para discrepancias", indicou.

Inés Rey, candidata do PSOE na alcaldía da Coruña / @fitoferreiro /mundiario