A Xunta mellorará "a visual do peregrino" no Camiño Portugués ao seu paso por Conxo (Santiago)
Procúrase "reducir o tráfico" e facer máis "visibles e identificables" as rutas.
Por E.P. | SANTIAGO DE COMPOSTELA | 04/08/2019 | Actualizada ás 14:23
A Xunta concedeu a licitación de "obras de mellora e integración paisaxística do Camiño Portugués" ao seu paso polo barrio santiagués de Conxo, cun orzamento de 1,6 millóns de euros para "mellorar a visual do peregrino" ao longo deste intinerario.
Así o confirmou a Administración autonómica este domingo nun comunicado, no que explicou que a intervención supón "unha reordenación" do percorrido e que ten como propósito "reducir o tráfico" e facer que as rutas sexan "visibles e identificables".
Entre as reformas planeadas atópase o mosteiro de Santa María de Conxo, na que a Xunta prevé acometer obras para "humanizala" e dotar ao barrio dunha "zona emblemática de acollida e goce de peregrinos e veciños", o que o Goberno galego describiu como a "propia Praza do Obradoiro" do barrio.
Ademais, o Executivo pretende configurar unha praza que se estenda ata o centro social, a escola infantil e o centro de saúde e, ao mesmo tempo quere manter as árbores e o cruceiro actual. Tamén adxudicou reformas nas zonas de carga e descarga e na parada de autobús que se atopan no perímetro do lugar.
Por todo iso, a Xunta sinalou que estas actuacións teñen importancia para o peregrinos pero tamén para os veciños. A Consellería de Infraestruturas e Mobilidade prevé iniciar os traballos en setembro e marcouse un prazo de nove meses para terminar as obras. Esta actuación está enmarcada no proxecto para mellorar as entradas das diferentes rutas dos Camiños de Santiago á cidade para o Xacobeo 2021.
