Os albergues esixen unha regulación dos pisos turísticos ante o "ritmo vertixinoso" ao que avanzan

A Asociación Galega de Albergues Privados, AGALBER, asegura que se senten "preocupados" ante a cada vez maior proliferación de vivendas de uso turístico dirixidas a peregrinos nos diferentes Camiños de Santiago que discorren por Galicia. Segundo os datos que manexa a entidade, existen máis de nove mil inmobles destinados a este uso, cuxas consecuencias, explican, se deixan sentir xa en diferentes áreas: "está a reducirse alarmantemente o número de vivendas para alugar, os concellos non crecen posto que non hai inmobles dispoñibles para os inquilinos e ademais supón unha competencia desleal para todo o sector de aloxamento no Camiño, que si ha de estar supeditado a normas estritas e inspeccións por parte da Administración".

Desde a Asociación ven con "grave preocupación" o ritmo "vertixinoso" ao que avanza esta práctica, non regulada nin controlada, con máis de 500 vivendas turísticas dadas de alta o último mes en Galicia. "Consideramos que tanto concellos (como é o caso de Santiago) como a Xunta poderían aplicar criterios máis estritos e de calidade para regular esta actividade". Un sector que, segundo explican, non está profesionalizado e non ofrece garantías para os usuarios destes aloxamentos. Ao que suman o "progresivo malestar das comunidades de veciños, estigmatizando ao peregrino até límites perigosos".

Agalber tamén pon sobre a mesa a "urxente necesidade" de establecer un diálogo fluído e continuo entre as principais entidades implicadas na recepción e acollida a peregrinos: Mancomunidades, Xunta, Deputación, etc. Critican a actual "deriva unilateral" que fai que as sinerxías non se aproveiten debidamente e que "a imaxe de escasa coordinación prexudique a quen máis debería beneficiar: ao peregrino". De feito, o tema da sinalización segue sendo unha das constantes á hora de elaborar unha lista de queixas dos camiñantes cara a Santiago, aseguran. 

Desde Agalber tamén manifestan a súa preocupación polo descenso de peregrinos neste 2019 en todo o Camiño Francés, como así o referendan os testemuños dos hospitaleiros de toda a ruta a Compostela. Respecto diso, entenden que "a Administración ha de promocionar e facer campañas de todas as rutas, pero precisamente a vía con maior número de peregrinos ha de ser tamén coidada e estar presente nas campañas e accións gobernamentais de forma constante". Por iso, apelan a sumar forzas para construír pontes e vías sólidas para o futuro.