Medran os traballadores emigrantes en Galicia e baixan no conxunto do estado

A Seguridade Social gañou unha media de 1.197 cotizantes estranxeiros en xullo en Galicia, o que supón un incremento do 3,10% en relación con xuño, ata situar o total de inmigrantes ocupados en 39.759, segundo os datos publicados este martes polo Ministerio de Traballo, Migracións e Seguridade Social.

Así, en comparación co mesmo mes de 2018, o aumento dos estranxeiros afiliados á Seguridade Social é do 9,32% na Comunidade galega.

A distribución por réximes é de 31.740 no xeneral, dos cales 27.136 pertencen ao subgrupo xeral, 1.499 ao Sistema Especial Agrario e 3.105 ao Fogar. Pola súa banda, déronse de alta en Galicia 6.705 autónomos estranxeiros e 1.314 traballadores no réxime do mar.

Segundo a procedencia dos novos dados de alta no sistema en Galicia, 16.459 son chegados de países da Unión Europea, mentres que 23.301 proveñen de estados extracomunitarios.

DATOS ESTATAIS

A nivel nacional, a Seguridade Social perdeu unha media de 7.901 cotizantes estranxeiros en xullo (-0,3%), ata situarse o total de inmigrantes ocupados en 2.170.368 persoas, segundo os mesmos datos do Ministerio.

Con este descenso, a afiliación de estranxeiros pon fin a unha serie de cinco meses consecutivos de ascensos con cifras descoñecidas desde 2008. Do total de afiliados estranxeiros inscritos a peche de xullo, 1.822.126 cotizan no Réxime Xeral (este dato inclúe o Sistema Especial Agrario e o do Fogar); 343.033 en Autónomos; 5.155 no Réxime do Mar, e 54 no do Carbón

Do total de traballadores inmigrantes afiliados á Seguridade Social, os grupos máis numerosos proceden de Romanía (352.102 afiliados), Marrocos (263.705), Italia (133.636) e China (107.689). Séguenlles os traballadores de Ecuador (77.097), Colombia (76.829), Reino Unido (68.379), Bulgaria (63.073), Venezuela (58.772) e Portugal (57.063).