Por Europa Press / Redacción | SANTIAGO DE COMPOSTELA | 03/09/2019 | Actualizada ás 15:01
O Colexio Profesional de Enxeñaría en Informática de Galicia (CPEIG) criticou que a empresa pública Navantia non inclúa a titulación de Enxeñaría en Informática no litado de formación regulada dos requisitos dunha oferta pública de analista de dirección financeira en Madrid.
Así o denunciou o colexio nun comunicado, no que acusan a esta entidade naval do Grupo SEPI de vulnerar o establecido na Lei 40/2015 do sector público na que, conforme sinalou, se especifica que "o resto do persoal será seleccionado mediante convocatoria pública baseada nos principios de igualdade, mérito e capacidade".
O Colexio Profesional de Enxeñaría en Informática de Galicia lembra que presentou hai uns meses un escrito ante o Ministerio de Facenda no que solicitaba a rectificación desta oferta, destinada a cubrir un posto con funcións para proporcionar solucións eficaces para as necesidades de análises de datos e xestión de procesos sobre o sistema de información de Navantia.
Para optar ao posto, conforme sinalou, os candidatos deben manexar ferramentas informáticas e uso de volumes elevados de datos, ademais de valorar positivamente o coñecemento a nivel usuario de SAP, ferramentas de xestión de proxectos, financeiras ou contables.
O colexio indicou que, na resposta de Navantia ao escrito, só se di que se admiten todo tipo de titulacións e que todas as candidaturas serán tidas en conta para o posto. Con todo, considerou que esta postura "non evita o prexuízo que se lles causa aos colexiados enxeñeiros en Informática, que ao descoñecer que poden optar ao posto deciden non presentarse".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.