Convocada unha cadea humana nas Pontes pola CIG en rexeitamento á "farsa" da transición xusta

A CIG chamou a participar nunha cadea humana simbólica ao redor do Concello das Pontes o vindeiro xoves, día 10 de xullo, ás 20,00 horas para mostrar o seu rexeitado á "farsa" da transición xusta.

Nun comunicado, a organización sindical denuncia "o proceso de dura reconversión que sofre a localidade sen que a día de hoxe existan alternativas reais para a reindustrialización e a creación de emprego".

"As Pontes é a zona cero da destrución industrial de Galicia", censura o sindicato, que sostén que "dous anos despois de autorizarse o peche da central térmica, non existe nin un só proxecto industrial en marcha a pesar das múltiples promesas e anuncios realizados polo Executivo estatal, a Xunta e o propio goberno municipal".

"Pero a realidade é unha constante destrución do emprego industrial e unha crise socioeconómica marcada pola perda de poboación, a caída de xente nova e da afiliación á Seguridade social, desvalorización do salario medio, peches no comercio e a hostalaría, etc.", indicou.

A organización sindical censura que "máis aló da propaganda non existe ningún plan industrial nin concurso de transición xusta" e que "Endesa vaise co apoio do Goberno, a Xunta e o Concello", "marcando os tempos e sen asumir ningunha responsabilidade".

Ademais, sinala que, para "profundar aínda máis nesta crise", Einsa Print comunicou a súa pretensión de pechar a actividade de artes gráficas "coa gravidade e o simbolismo de ser a primeira empresa en instalarse no Polígono de Penapurreira" no marco do plan de desenvolvemento asinado en 1997.

Situación da mina das Pontes cando estaba na súa máxima actividade | Fonte: Remitida FP