Prisión provisional sen fianza para o asasino de Valga, que se enfronta a prisión permanente revisable

O xulgado número dous de Caldas de Reis (Pontevedra), especializado en Violencia sobre a Muller, ditou, segundo informaron a Efe fontes xurídicas, prisión provisional comunicada e sen fianza para José Luís Abet Lafuente, autor confeso do triplo asasinato acontecido en Valga este luns.

Segundo informaron fontes xudiciais, o xulgado decretou prisión provisional comunicada e sen fianza para o detido, ao que a xuíza instrutora da causa imputa tres delitos de asasinato que, segundo concretan as mesmas fontes, pode levar a pena de prisión permanente revisable.

O arrestado, de 45 anos e residente actualmente en Ames (A Coruña), pasou a disposición xudicial na mañá deste martes no Xulgado de Instrución Número 2 de Caldas de Reis (Pontevedra). O autor compareceu ante a maxistrada do Xulgado de Instrución número 2 de Caldas, que se atopaba de garda no momento dos feitos e, ademais, é a competente en casos de violencia de xénero.

Por outra banda, o delegado do Goberno en Galicia, Javier Losada, avanzou que se investiga como o acusado do triplo crime machista de Valga, obtivo o revólver utilizado no suceso, xa que non contaba co permiso necesario para dispor desta arma. Preguntado polos medios tras un acto celebrado este martes en Vigo, concretou que tamén se busca coñecer se este revólver de calibre 32 xa fora utilizado con anterioridade.

OS MENORES

Doutra banda, tampouco está notificada a decisión sobre a patria potestade dos dous menores implicados no crime, os dous fillos de sete e catro anos, respectivamente, do autor confeso e dunha das vítimas, Sandra B..

Este luns fontes da investigación e o propio alcalde de Valga, José María Bello, avanzaran que os menores quedarían finalmente cun familiar directo, por recomendación dun equipo de psicólogos. Os nenos permanecen provisionalmente co irmán da súa avoa, unha decisión tomada de forma conxunta pola xuíza, os servizos sociais municipais e o equipo de menores da Xunta.

Esta medida manterase polo menos ata o mércores, cando a maxistrada tome declaración aos nenos, momento no que poderá continuarse coa avaliación completa da situación a menos que se determine que existe algunha situación de risco que obriga a asumir a tutela.

REACCIÓNS

A secretaria primeira da Comisión de Seguimento e Avaliación dos Acordos do Pacto de Estado contra a violencia de Xénero, a lucense Sonsoles López Izquierdo, confirmou que o tratamento de triplo crime de Valga só abordará como violencia machista a morte da ex muller do detido en relación cos feitos e non os da súa nai e irmá.

López Izquierdo, que é deputada socialista por Lugo, cualificou o sucedido de "atrocidade". "Non deixamos de expresar o noso rexeitamento a estes comportamentos e o noso compromiso é buscar unha solución para reducir este problema, que é un problema social. Aproveito para dar as condolencias á familia e amizades desas tres mulleres", comentou.

En canto ao tratamento do tres crimes como violencia de xénero, avanzou que "non" é o caso porque "esa é unha das problemáticas que ten a situación actual na lexislación de violencia de xénero". No entanto, deixou claro que ese recoñecemento "é algo que se está pondo en marcha". "Hai que ampliar a consideración de vítimas de violencia de xénero", reclamou.

Tamén o ministro do Interior en funcións, Fernando Grande-Marlaka, apuntou que detrás do tres asasinatos de Valga o que subxace "é a violencia de xénero e machista". "Que quede claro que o que si hai e subxace abaixo é violencia de xénero e violencia machista. Non a chamemos doutra forma", sinalou o ministro en declaracións aos xornalistas, tras ser preguntado polo feito de que a ex sogra e ex cuñada queden fóra do rexistro de mulleres vítimas mortais por este tipo de violencia.

VÍTIMAS

Pola súa banda, Unidas Podemos reclamou este martes o Goberno en funcións as reformas lexislativas necesarias e "de urxencia" para que tamén se consideren vítimas de violencia de xénero ás mulleres asasinadas por un home aínda que non teñan relacións afectivas ou de parella con el.

FEITOS

O detido desprazouse á primeira hora da mañá deste luns ata Valga, onde sorprendeu a súa ex parella cando saía do seu domicilio cos seus dous fillos, de sete e catro anos. Tras disparar en Valga contra ela, a nai e a irmá, entregouse no municipio de Ames (A Coruña).

Na tarde deste luns efectivos do GEAS da Coruña localizaron un revólver, supostamente empregado no triplo crime, e unha caixa de munición no río Tambre, nas inmediacións de Ames-Aldea Pontenova.

O home está acusado de disparar mortalmente a súa ex muller, ex sogra e ex cuñada. Tras entregarse estivo custodiado pola Garda Civil.