Confirman o arquivo da investigación contra dous cargos da Xunta por supostas coaccións inmobiliarias

O Xulgado de Instrución número 2 de Ourense acordou o sobresemento definitivo e arquivo da causa na que se investigaba a dous cargos da Xunta pola presunta comisión dun delito de coaccións inmobiliarias a unha nonaxenaria residente no edificio da antiga Cámara da Propiedade Urbana da cidade das Burgas.

Nun auto emitido o pasado luns 7 de outubro contra o que non cabe recurso, os maxistrados desestiman a apelación presentada polos avogados da afectada contra o fallo ditado a comezos de abril que arquivaba e sobreseía provisionalmente a causa.

Entón, o xuíz instrutor xustificou a súa decisión ao non advertir un ánimo "admonitorio ou coactivo suficiente para integrar o tipo penal", máis aló da "intención recoñecida da Consellería de Facenda de recuperar a posesión do inmoble" no ámbito dun plan xeral de racionalización do patrimonio inmobiliario e "non de forma caprichosa ou intencionada".

Agora, os maxistrados dan por bos os argumentos do xuíz instrutor, que expresou no seu auto do mes de abril que, no entanto, a Xunta "descoidou de forma notoria e continuada no tempo os labores de mantemento do edificio, como é o caso da limpeza de zonas comúns ou mantemento básico". Tamén apreciou "unha certa demora á hora de acometer a reparación do ascensor do edifico", que se mantivo estragado entre xaneiro e novembro de 2018.

Así, destacou que o outro inquilino do edificio ao que Facenda tamén remitiu comunicacións manifestou que "nunca" se sentiu "coaccionado ou forzado" para que desaloxase a vivenda.

Entre outras cuestións, o xulgado tivo en conta o "amplo lapso temporal", de máis de "cinco anos", no que a Xunta enviou os requirimentos de desaloxo á denunciante.

Na súa denuncia, do 28 de setembro de 2018, o fiscal xefe acusaba a ambos os cargos da Xunta de tentar presionar a dous inquilinos do edificio da antiga Cámara da Propiedade Urbana de Ourense, situado na Avenida da Habana e de titularidade da Administración galega, para que desaloxasen as súas vivendas, "non substituíndose a iluminación" ou "non realizando o mantemento do ascensor", tras a negativa do Xulgado de Primeira Instancia Número 2 de Ourense e da Audiencia Provincial de Ourense á súa petición de desafiuzamento.