A Xunta requirirá un plan de viabilidade a Ferroatlántica cando se formalice a titularidade das centrais
Os ríos de Galicia Costa contan con catro concesións hidroeléctricas caducadas e Augas avalía cal será o seu futuro.
Por E.P. | SANTIAGO DE COMPOSTELA | 16/10/2019 | Actualizada ás 13:56
O director xeral de Enerxía e Minas, Ángel Bernardo Tahoces, informou de que se requirirá un plan de viabilidade a Ferroatlántica no momento no que formalice a "íntegra" titularidade das centrais hidroeléctricas.
En resposta ao PSdeG na a comisión de Industria, Tahoces explicou que a operación de transmisión do 100% da titularidade de Ferroatlántica a TPG "non está suxeita a autorización administrativa previa" porque "non afecta a titularidade das concesións".
En cambio, si que necesita autorización administrativa previa "o exercicio de opción de compra do arrendamento financeiro para que, deste xeito, Ferroatlántica ostente a titularidade do 100% das centrais hidroeléctricas do río Xallas e Grande", a cal "foi outorgada no mes de agosto" polo Goberno galego. E é que contaba cun préstamo bancario sobre estes activos.
De tal forma, o Goberno procederá a pedir o plan industrial "no momento no que formalice a inscrición rexistral desta opción de compra do arrendamento financeiro" e que a "íntegra" titularidade das centrais hidroeléctricas "estea en mans de Ferroatlántica".
Así mesmo, Tahoces remarcou que a Xunta realiza un "control pormenorizado" sobre as súas concesións, de forma que asegura que "non hai ningún tipo de incumprimento" das condicións neste caso, ao non existir unha segregación entre a actividade de ferroaleaciones e das centrais hidroeléctricas, indica.
Pola súa banda, Begoña Rodríguez Rumbo (PSdeG) mostrou as "dúbidas e alarmas" existentes pola falta dun plan de viabilidade da empresa, que considera "esencial". Así mesmo, chama á Xunta á "obrigación" do cumprimento coa non segregación de actividades.
CADUCIDADE DE CATRO CONCESIÓNS EN GALICIA COSTA
Noutra orde de cousas, a directora de Augas de Galicia, Teresa Gutiérrez, informou nesta comisión de que están en tramitación catro expedientes sobre o futuro de concesións hidroeléctricas caducadas na demarcación Galicia Costa, que depende do Goberno galego.
En concreto, este catro casos atópanse en: a presa do Inferno, no río Verdugo; o salto de Güimil, no río Lambre; en Castellana, no río Mandeo; e no aproveitamento de Fervenzas, no río Bexo.
En resposta a En Marea, apunta que se decidirá sobre o seu futuro, que pode pasar por tres opcións: a eliminación de obras construídas e restitución de terreos; a conservación de parte de instalacións (por interese patrimonial ou impacto ambiental positivo); así como coa conservación das instalacións para continuar coa explotación hidroeléctrica.
Este catro casos en Galicia Costa están "pendentes ou en fase de emisión de informe de compatibilidade coa planificación hidrolóxica", que "é moi complexo", xa que se estuda o efecto dos saltos nos ecosistemas e marca "o futuro das seguintes fases". Por agora, realizáronse "os primeiros trámites".
Con todo, Teresa Gutiérrez indica que, se existe a posibilidade da continuidade do aproveitamento hidroeléctrico, "sempre" se fará nun modelo de xestión que "reverta no interese público".
Respecto diso, Pancho Casal (En Marea) pide á Xunta "ir máis aló" con estas concesións para a súa reversión "de verdade para a utilidade pública" e apunta á posibilidade de novas vías de xestión como as comunidades enerxéticas locais.
