Por Europa Press / Redacción | SANTIAGO DE COMPOSTELA | 30/10/2019 | Actualizada ás 14:54
O Consello de Contas terá un orzamento en 2020 de case 7,7 millóns de euros, cunha subida do 5,3% respecto de 2019, dedicada en boa parte a contratar a dous auditores novos. Con todo, a oposición considera este incremento "insuficiente" para as súas atribucións de prevención da corrupción.
O conselleiro maior de Contas, José Antonio Redondo detallou os orzamentos, que contan con "o maior incremento na última década", por encima da media da Xunta e outros órganos estatutarios. Con todo, a alza explícase polas dúas novas prazas de auditores (da escala administrativa máis alta), a cobertura da carreira profesional e o incremento salarial do 2,2% para os traballadores dun persoal de 90 efectivos.
Así, Redondo valora que a incorporación de auditores será "moi importante" para a reordenación de Contas, aínda que remarca que "non é chegar e porse a traballar como especialista" pois "se necesita cultura de auditoría".
COMPETENCIAS CONTRA A CORRUPCIÓN
Durante o debate, a oposición dixo que estas dúas prazas non son suficientes para loitar contra a corrupción. Begoña Rodríguez Rumbo (PSdeG) lamentou que as contas son "insuficientes" para "profundar nos labores outorgados" nas súas novas competencias. Ademais, considera que o orzamento "case non merecía explicación" porque tan só hai unha alza en persoal, a partida "máis deficitaria".
Nesta liña, Manuel Lago (Común da Esquerda) considera que o orzamento é "correcto para o pasado, pero insuficiente para os desafíos que as novas técnicas de control expoñen para organismos como este".
Así mesmo, Noa Presas (BNG) sinalou que é normal que Contas teña o seu maior incremento nunha década polos recortes padecidos nos últimos anos. Ademais, mostrou "certa desconfianza" en que se poidan desenvolver as competencias en relación con corrupción, dado que o Goberno galego "non ten demasiado interese en que se poña en práctica" de forma "ambiciosa".
Nesta liña, Luís Villares, de En Marea, cuestionou que Contas teña os medios e recursos suficientes. En cambio, Cristina Romeu (PP) dixo "non dubidar" de que as contas do organismo cobren as necesidades de recursos materiais e persoais.
Na súa quenda de réplica, José Antonio Redondo fixo un percorrido polas actuacións para a posta en marcha nos últimos anos das funcións deste órgano de prevención da corrupción, xa que lembra que "houbo que empezar a casa desde o principio".
Así, referiuse a os diferentes regulamentos e aos acordos con institucións --como Xunta, deputacións e Fiscalía-- para a prevención, aínda que se remitiu a unha próxima intervención no Parlamento para analizar en profundidade os resultados das accións fronte á corrupción.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.