G. Caballero pide ir votar "chova ou neve" e chama á mocidade a ser "protagonistas" das eleccións

O secretario xeral do PSdeG, Gonzalo Caballero, asegurou que aínda que "chova ou neve" o vindeiro domingo hai que ir votar " polo progreso de España e de Galicia" e fixo un chamamento á mocidade para que sexan "protagonistas" destas eleccións.

Acompañado polo alcalde de Vilagarcía de Arousa, Alberto Varela, Gonzalo Caballero visitou esta localidade pontevedresa con motivo da última campaña electoral.

Na súa intervención, o líder do PSdeG animou á mocidade a participar neste proceso político e aseguroulles que "o Partido Socialista é a casa común dos mozos" para "gañar catro anos de progreso polos seus dereitos".

Ademais, lembrou que o pasado 28 de abril os socialistas gañaron "con claridade" as eleccións en todas as cidades galegas e que a súa formación tivo "un apoio moi maioritario da xente máis nova".

"Tres de cada catro mozos queren sacar a Feijóo da Xunta e queremos pedirlles que participen, que se fagan protagonistas deste proceso político", manifestou.

"ÚNICA PAPELETA DE AVANCE"

Gonzalo Caballero subliñou que nesta cita electoral "a única papeleta para o avance do país" é o Partido Socialista, que é a "garantía para frear á dereita que quere recortar liberdades, facer retroceder en dereitos sociais e acabar coa autonomía galega".

Todo iso nunha intervención na que o xefe de filas dos socialistas galegos definiuao Partido Socialista nunha "forza constitucional que sabe gobernar España, que toma decisións que melloran a vida da maioría da cidadanía".

"E pedímoslle o voto a todos os galegos, tamén a aqueles que votaron ao Partido Popular noutras eleccións e que non están satisfeitos con que o PP perdesen a mesura, a moderación e se entregase aos pactos coa ultradereita", sinalou.

IMPORTANCIA DO VOTO

Pola súa banda, o alcalde de Vilagarcía, Alberto Varela, subliñou a importancia de exercer o dereito ao voto tras moitos anos nos que "neste país se pelexou moito" por poder ir votar. "Por iso, o primeiro que quero dicir é que o domingo hai unhas eleccións e os que non van votar, outros van elixir por eles", apuntou.

"Son eleccións fundamentais porque imos decidir o futuro do país", sinalou o alcalde, que animou aos seus veciños a elixir "ao que mellor convenlle á cidade". "Necesitamos ter un goberno forte, que atenda ás nosas necesidades como cidade en contraposición a un PP que leva anos castigándoa", apuntou.

O secretario xeral do PSdeG, Gonzalo Caballero, en declaracións aos medios en Pontevedra. PSDEG