Participa nun pioneiro estudo sobre as violencias machistas que sofren as mulleres nais
Maternidades Feministas de Compostela distribuirá un cuestionario en liña e, unha vez recompilados os datos, dirixirase ás institucións
Por Europa Press / Redacción | SANTIAGO DE COMPOSTELA | 27/11/2019 | Actualizada ás 14:20
As violencias machistas que sofren as mulleres nais serán obxecto dun estudo "pioneiro" que, a partir dun cuestionario en liña, realizará a asociación Maternidades Feministas de Compostela (MaterFEM) e cuxos primeiros resultados se concretarán nun informe que a organización espera ter listo en torno ao 8 de marzo do ano próximo.
Cos datos na man, a organización prevé reunirse con institucións para esixir medidas e impulsar actividades de visibilización para enfocar o problema. Todo iso, ademais de pór encima da mesa propostas para combater calquera tipo de violencia machista cotiá na maternidade.
Comba Campoy e Sabela Losada, de MaterFEM, encargáronse de presentar este mércores na libraría Lila de Lilith este Observatorio sobre as violencias machistas que, na forma de cuestionario en liña, está organizado en varios apartados en función da violencia experimentada: institucional, obstétrica e sexual, estrutural, cultural ou económica, entre outras.
Campoy repasou a historia de MaterFEM e como nace a partir dunha convocatoria aberta ás nais de Compostela no marco de "unha situación vital nova na que cambia todo e hai que pedir axuda". O obxectivo era superar "unha fractura" e a percepción de "exclusión do activismo feminista" polo feito de "ser nais" --con problemáticas específicas, como a dificultade para facer "folga" de coidados cando se é responsable dunha persoa totalmente dependente como pode ser un bebé que mama--.
A "sonoridade" e o afán de formalizar as redes de apoio mutuo que se tecen no ámbito individual fixaron as bases dunha organización que aspira a reclamar espazo na axenda política para as mulleres nais a partir de ferramentas como o Observatorio presentado este mércores.
"DE MULLERES NAIS PARA MULLERES NAIS"
Sabela Losada explicou que a este "chamamento" responderon nais de distintas idades e con diferentes circunstancias vitais, que viven en Compostela ou están ligadas á cidade. Agora, conscientes da importancia de realizar "un diagnóstico" e recompilar datos sobre as violencias machistas pon en marcha este cuestionario.
O Observatorio aspira a analizar todo aquilo que fai ás nais "a vida máis difícil" máis aló dos propios cambios que leva ter un fillo e habituarse "aos ritmos de crianza, así como aos novos ritmos laboral e familiar", e conxugar as "múltiples facetas" que conforman a poliédrica maternidade.
"Este proxecto está feito por mulleres nais e para mulleres nais. Non hai empresas, institucións, nin ONG detrás", remarcou Losada, antes de incidir en que para articular esta ferramenta colaboraron membros dun colectivo de nais con distintas profesións como xornalistas, politólogas e educadoras.
CUESTIONARIO
O cuestionario aborda varios tipos de violencia, entre eles a institucional, con preguntas coma se recibiuse "malos tratos" en puntos de encontro familiar; ou no ámbito psicolóxico, coma se a nai en cuestión sente "desvalorizada e cuestionada" na súa contorna ou no mundo laboral.
Tamén se preocupa pola violencia económica preguntando por se se sufriu "falta de axudas" ou "discriminación" a familias monomarentales; ou violencia obstétrica e sexual, entre outras, con cuestións relativas ao trato médico e ás relacións sexuais posteriores ao parto.
