Os biólogos denuncian que a Xunta ofrece unha praza desta especialidade a calquera titulado nunha carreira de ciencias

O Colexio Oficial de Biólogos de Galicia denunciou que a Xunta permita que calquera titulado nunha licenciatura ou grao da rama de ciencias poida optar a unha praza de biólogo na administración autonómica.

O Colexio cualifica de "disparatado" que "a homologación de todas as titulacións da rama de ciencias" permita que á convocatoria de emprego público para a praza da especialicidade de bioloxía poidan concorrer "tan dispares opcións académicas".

E é que, segundo denuncia o Colexio galego de biólogos, a convocatoria está aberta a calquera persoa que conte cun título universitario na rama de ciencias: bioloxía, bioquímica, ciencias ambientais, ciencias do mar, ciencias e ténicas estatísticas, física, xeoloxía, matemáticas, química e enoloxía.

"Existe unha regulación específica da profesión de biólogo, perfectamente definida e diferenciada das demais da rama de ciencias, o que permite concluír que á especialidade de bioloxía debe accederse exclusivamente coa titulación de bioloxía", incide o colectivo.

Así, instan á Administración autonómica a rectificar esta convocatoria "absurda" e que se limite aos titulados en bioloxía o acceso a estas prazas.