Piden penas que suman 16 anos para os acusados de levar heroína de Portugal a Vilagarcía

A Fiscalía pide penas que suman case 16 anos de cárcere e máis de 250.000 euros en multas para tres acusados de transportar un paquete con heroína desde Portugal ata Vilagarcía de Arousa, e que serán xulgados o martes e o xoves na sección segunda da Audiencia Provincial de Pontevedra.

Segundo o escrito de acusación pública, M.F.A.L. e I.R.O. desprazáronse a Portugal a principios de 2015, por indicación do terceiro acusado, G.C.M.R., para comprar heroína e trasladala, nun coche dun terceiro, a Vilagarcía de Arousa.

Ambos foron detidos o 3 de xuño de 2015 nas inmediacións do domicilio de G.C., cando se dispuñan a entregarlle a droga. Así, nun cacheo superficial a M.F., os axentes atopáronlle un paquete con case 350 gramos de heroína (cun valor duns 18.800 euros no mercado ilícito).

G.C.M.R. tamén foi detido e, no rexistro do seu domicilio, os investigadores atoparon unha pistola semiautomática recamarada, uns 140 gramos de cocaína repartidos en distintas bolsas, uns 70 gramos de heroína, diversas sustancias de corte, case 2.000 euros en efectivo, unha báscula, unha máquina de envasado ao baleiro, varios móbiles e cartóns, e varios reloxos. No rexistro da vivenda de M.F.A.L., atopáronse varios teléfonos móbiles e cartóns.

Ademais, dáse a circunstancia de que, no transcurso da investigación, se puido comprobar que tanto G.C. como M.F. estiveran conducindo senllos vehículos, a pesar de que ningún ten carné de conducir. De feito, ambos teñen antecedentes penais por conducir sen o preceptivo permiso.

DELITOS E PENAS

Por estes feitos, a Fiscalía pide para G.C.M.R. a pena de 5 anos e 9 meses de cárcere e o pago dunha multa de 85.375 euros por un delito de tráfico de drogas; outros 2 anos por tenencia ilícita de armas; e 7 meses por un delito contra a seguridade viaria, aplicando a circunstancia agravante de reincidencia.

No caso de M.F.A.L., pide 5 anos de cárcere por tráfico de drogas e o pago dunha multa de 85.375 euros; e outro sete meses de prisión por reincidir no delito contra a seguridade viaria.

Finalmente, solicita a pena de 5 anos de cárcere e multa de 85.375 euros para o acusado I.R.O.

Audiencia Provincial de Pontevedra.