Por E.P. | SANTIAGO DE COMPOSTELA | 08/12/2019 | Actualizada ás 12:38
A sección sexta da Audiencia Provincial da Coruña, con sede en Santiago, acollerá desde o luns o xuízo contra un veciño de Ribeira acusado de homicidio por matar a puñaladas a unha amiga coa que convivía.
Segundo o escrito de acusación de Fiscalía, os feitos remóntanse ao mes de xullo de 2017, cando o acusado e a vítima, aos que unía unha relación de amizade, vivían xuntos na zona de Ribeira.
O día 31, di o Ministerio Público, ambos pasaron a noite con varios coñecidos e, ben en compañía deles ou ben posteriormente, consumiron cocaína. Ademais, o acusado inxerira "moito alcol".
O fiscal precisa que era coñecido na súa contorna que, "cando o acusado inxería alcol e cocaína", se poñía "nunha actitude extremadamente violenta", algo que interfería na súa capacidade intelectiva.
Tras marcharse os coñecidos en común, e mentres ceaban, a vítima e o acusado mantiveron unha forte discusión "por temas de diñeiro", durante a cal o procesado colleu un coitelo de cociña de 15 centímetros de folla coa intención de atacar á vítima.
Ela "fuxiu escaleiras arriba tratando de refuxiarse nalgunha das estancias do piso superior", pero foi alcanzada no cuarto de baño, onde o acusado a acoitelou varias veces. Dous das puñaladas atravesaron a cavidade torácica e abdominal e, tras lesionar o pulmón, alcanzaron a aorta descendente, unha "lesión mortal". A vítima faleceu pola hemorraxia aguda interna "de forma inmediata".
Tras darse conta de que non se movía, o home "tentou facer torniquetes" á vítima co pantalón que ela vestía e unha camiseta e chamou ao 112 para avisar e facer crer que outra persoa a atacou. O acusado fuxiu ao chegar a ambulancia, pero foi detido pouco tempo despois.
Por estes feitos, Fiscalía considera ao home autor dun delito de homicidio e pide para el, tendo en conta que tiña alteradas as capacidades volitivas, a pena de 12 anos e medio de prisión. A maiores, reclama que indemnice ao único fillo da muller, co que non vivía, con 100.000 euros. Interesouse que se vexa en sala a gravación coa segunda declaración do acusado, na que recoñece os feitos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.