A eólica pode satisfacer xa o 70% da demanda eléctrica galega actual

Galicia conta con 4.700 megawatts de potencia eólica preparada para a súa explotación, unha cantidade coa que se podería cubrir o 70 por cento da demanda eléctrica actual da Comunidade.

Segundo a Asociación Eólica de Galicia (EGA), a enerxía xerada polos eólicos supón 3.614 megawatts de potencia. Con todo, os datos da Rede Eléctrica Española (REE) aseguran que a data de 31 de outubro de 2019 existen 4.700 megawatts dispoñibles para a produción eléctrica.

Por este motivo, "o sector eólico galego dispón nestes momentos dun volume de megawatts suficientes para afrontar a transición enerxética nos próximos anos", determina a EGA.

Para conseguilo, a asociación sostén que se precisa de infraestruturas na rede eléctrica de transporte, "xa planificadas ou pendentes da súa inclusión" na nova planificación 2021-2026 elaborada pola REE.

O obxectivo da EGA pasa por implantar 500 megawatts de potencia eléctrica por ano, o que suporía a posta en marcha de entre 16 e 20 novos parques eólicos.

Polo momento, estes 4.700 megawatts que existen na actualidade permitirían satisfacer o 70% da demanda eléctrica galega.

"Se consideramos que os parques actuais xa achegan máis de 40% do consumo" anual, conclúese que "a demanda eléctrica galega será amplamente superada pola xeración eólica no horizonte de 2030", conclúen.