Luca Chao cre que "xaneiro será o momento" para "reactivar" o diálogo con Anova e EU
Desliga estas negociacións do traballo do Grupo Común dá Esquerda, pero di que o contacto "nunca rompeu" e foi "permanente".
Por E.P. | SANTIAGO DE COMPOSTELA | 23/12/2019 | Actualizada ás 11:51
A viceportavoz do Grupo Común da Esquerda e membro de Podemos Luca Chao cre que "xaneiro será o momento no que se reactive o calendario político" para iniciar contactos con Anova e Esquerda Unida (EU) de cara a conformar unha candidatura unitaria para as eleccións autonómicas do 2020.
Nunha rolda de prensa celebrada este luns no Parlamento galego, Chao quixo desligar o traballo do grupo parlamentario, no que conflúen as tres forzas, dese debate sobre como concorrerán en futuros comicios.
Con todo, si admitiu que ese diálogo "nunca rompeu", senón que "foi permanente en todos estes meses e anos que levamos traballando xuntos e que vai continuar con total normalidade" o que queda de lexislatura.
Anova, que acaba de celebrar unha Asemblea Nacional e de elixir unha nova dirección, da que seguirá á fronte Antón Sánchez, apelou este fin de semana a iniciar "xa" esas negociacións despois de que non frutificasen para as dúas xerais de 2019, nas que Podemos e EU se presentaron coa marca Galicia en Común.
Preguntada sobre se xa houbo contactos cos nacionalistas, Chao respondeu: "Que teñamos constancia, non. A asemblea de Anova foi hai unha semana, entendo que o calendario tampouco o fai posible. Hai agora un parón do Nadal, seguramente que xaneiro será o momento no que se reactive o calendario político".
FIGURA DE MARTIÑO NORIEGA
Ademais, preguntada sobre se Martiño Noriega, exalcalde de Santiago e membro da dirección de Anova, é o perfil adecuado para porse á fronte das negociacións por parte do partido nacionalista, a dirixente de Podemos Galicia quixo mostrarse "absolutamente respectuosa e escrupulosa" coas decisións das outras organizacións.
"Non podemos valorar se será máis ou menos sinxelo. Forma parte da autonomía absoluta de Anova. Pola nosa banda, absoluto respecto e seguro que con calquera persoa que escolla calquera organización o diálogo será fructuoso", insistiu Luca Chao.
