O CPXG advirte da espectacularización da información

Convida a medios e xornalistas a revisaren as súas axendas informativas en 2020

Por Galicia Confidencial | Compostela | 31/12/2019 | Actualizada ás 09:00

Comparte esta noticia

"Ante a irrupción de procesos de polarización ideolóxica que conducen á creba dos consensos sociais básicos, a prensa debe reafirmarse hoxe no seu papel como elemento democratizador". É o aviso do Colexio Profesional de Xornalistas de Galicia (CPXG) que suliña que, nun momento como o actual, hai que dar datos veraces e versións contrastadas sobre os feitos para loitar contra os bulos e fake news.

Xurxo Salgado, Xosé Hermida, Virginia P. Alonso, Fernando Varela, David Lombao e María Obelleiro na mesa redonda 'Os novos movementos extremistas e como afrontar o fenómeno desde o xornalismo'
Xurxo Salgado, Xosé Hermida, Virginia P. Alonso, Fernando Varela, David Lombao e María Obelleiro na mesa redonda 'Os novos movementos extremistas e como afrontar o fenómeno desde o xornalismo'

Así se subliñou nas xornadas sobre desinformación organizadas polo CPXG no pasado mes de novembro, que poden recuperarse na canle de youtube do Colexio. O Colexio de Xornalistas de Galicia observa con preocupación a imparable espectacularización dos produtos informativos. Na competición por conquistar a atención dos cidadáns, moitos medios somérxense na exaltación audiovisual do conflito, do medo ou da raiba. 

"Cómpre especial tento naqueles casos nos que, con certo cinismo, se pretende apelar á liberdade de opinión e expresión para introducir no debate público ideas que cuestionan dereitos fundamentais. Merecen un apuntamento especial os dereitos das mulleres, que non podemos consentir que se poñan en dúbida", indica nun comunicado.

 

Por iso, aconsella coidar a linguaxe, fuxir das narracións hiperbólicas e escapar das retóricas que magnifican problemas para atender intereses espurios xa que os medios deben suplir sempre con debate e sosego as dinámicas de confrontación social.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta