Cifran en 5.500 os contratos que xerará a campaña de rebaixas en Galicia, case un 4% máis que en 2019
Galicia quedaría situada no oitavo lugar da clasificación de comunidades autónomas en termos de creación de emprego, segundo o grupo de recursos humanos Adecco.
Por Europa Press / Redacción | SANTIAGO DE COMPOSTELA | 02/01/2020 | Actualizada ás 16:42
O grupo de recursos humanos Adecco cifra en 5.500 os contratos laborais que se xerarán en Galicia durante a campaña de rebaixas, o que supón un 3,9 por cento máis que o pasado ano.
Así, Galicia quedaría situada no oitavo lugar da clasificación de comunidades autónomas en termos de creación de emprego nas rebaixas, ranking que encabeza Cataluña (23.820) e pecha Estremadura (413).
Por provincias, Pontevedra será a que maior número de contratos rexistre con 2.553 aínda que A Coruña obterá os mellores resultados en comparación co próximo ano ao crecer un 7 por cento ata alcanzar os 2.386.
Segundo Adecco, Ourense manterá os 314 contratos asinados na campaña de 2019 e Lugo continuará sendo a que menor creación de emprego rexistre con 209.
