O Sergas mantén a "esperanza" de atopar pediatras para reabrir o paridoiro de Verín
A súa nova directora ten a intención de polo de novo en funcionamento canto antes, para o que está a entrevistar profesionais para cubrir as dúas prazas vacantes.
Por Europa Press / Redacción | SANTIAGO DE COMPOSTELA | 10/01/2020 | Actualizada ás 15:58
O director xeral de Asistencia Sanitaria do Sergas, Jorge Aboal, destacou este venres que seguen "buscando pediatras" para poder reabrir o paridoiro do Hospital de Verín, despois de que a súa nova directora, Guillermina Agulla, anunciase a intención de polo de novo en funcionamento canto antes, para o que está a entrevistar profesionais para cubrir as dúas prazas vacantes.
"Seguimos buscando pediatras", afirmou Aboal tras presentar o balance de transplantes. "Vou falar desde a esperanza, espero que os atopemos", abundou.
Aboal lembrou que "neste momento a convocatoria se pechou —o pasado 7 de xaneiro— e non se presentou ninguén". "Pero seguiremos buscando", insistiu, para lembrar que foi a segunda vez que se convocan as prazas e queda a convocatoria deserta.
Preguntado sobre se vai haber melloras na oferta, Aboal resaltou que valoran e tentan "atraer pediatras". "E isto é o que neste momento estamos a valorar", sentenciou, para asegurar que traballan nunha terceira vía.
De feito a doutora Agulla avanzou este venres que tiña previstas tres entrevistas con pediatras, dous deles vía teléfono ao ser profesionais que residen fóra de Galicia e que se interesaron polos postos fóra de prazo.
