Podemos Galicia aproba a nova executiva, que terá doce secretarías
Gómez-Reino, secretario xeral do partido, di que o seu obxectivo é xogar un papel "central" para rematar coa "década negra" de Feijóo.
Por E.P. | SANTIAGO DE COMPOSTELA | 25/01/2020 | Actualizada ás 19:39
O Consello de Coordinación de Podemos Galicia aprobou este sábado a conformación da súa nova executiva, que conta con doce secretarías técnicas. Así, o partido prepárase como unha "alternativa de Goberno" para a Xunta de Galicia.
O secretario xeral do partido, Antón Gómez-Reino, destacou o "papel central" que Podemos Galicia quere asumir "no espazo político de progreso" cunha "proposta madura e de continuidade" ao realizado ao longo destes anos. Unha postura que levou "á forza galega, Galicia en Común, a estar no Goberno de coalición no Estado".
O próximo obxectivo será "traballar para conformar un equipo de Goberno para a Xunta que acabe coa década negra de Feijóo e permita construír unha Galicia máis xusta, igualitaria, solidaria e feminista", precisou.
Gómez-Reino tamén está convencido de poder facelo a través do seu partido, que está "en condicións" grazas á creación de doce novas secretarías que contan con personalidades "experimentadas".
NOVAS SECRETARÍAS
A Secretaría de Rexeneración Democrática contará con Elena Pernas, licenciada en Dereito e especializada en Dereito Constitucional e Dereitos Humanos. No departamento de Sanidade e Saúde Pública estará o médico cirurxián especialista en transplantes de órganos José García Buitrón.
Por outra banda, a Secretaría de Acción de Goberno dependerá de Ángela Rodríguez, licenciada en Filosofía cun posgrao en Pensamento Social, así como especialista en Violencia de Xénero. Na Secretaría de Ciencia e Investigación haberá un licenciado en Química con posgrao en Física aplicada que é profesor nun instituto, David Bruzos.
A secretaria de Refuxio e Migracións será para Rocío Fraga, socióloga especializada en emprego, igualdade de oportunidades e metodoloxías de investigación social, que desenvolveu o seu traballo incorporando a perspectiva de xénero. En canto a Secretaría de Benestar Animal rexerase por Rubén Pérez Sueiras, traballador social que exerce como consultor para a Fundación Franz Weber.
No ámbito da Acción Lexislativa e Xurídica, Podemos elixiu a Noemí Martínez González como secretaria; licenciada en Dereito, Ciencias Políticas e da Administración. En Cultura estará José Manuel Sada, filólogo hispánico, programador cultural e escritor cinematográfico cunha extensa traxectoria como xestor neste campo.
Outra das novas secretarías é a de Dereitos da Infancia, dirixida por María de la O. Fernández, profesora e psicopedagoga. Así mesmo, na Secretaría de LGTBIQ+ traballará Adrián García Seijas, licenciado en Ciencias Políticas que traballa como comercial do sector das telecomunicacións e exerce un intenso labor sindical.
Na Secretaría de Mobilidade, Enrique Pérez Fernández asumirá o mando. Informático e activista no ecoloxismo, traballa para unha mobilidade activa e sustentable. Por último o secretario de Medio Ambiente e Movementos Sociais será Álex Botello, que se atopa cursando Enxeñaría Civil e está a piques de graduarse.
