Amplían a 15 anos o período máximo de prisión provisional para 'O Chicle'
José Enrique Abuín permanece no cárcere desde a súa detención o 29 de decembro de 2017.
Por Europa Press / Redacción | SANTIAGO DE COMPOSTELA | 27/01/2020 | Actualizada ás 14:07
A Audiencia Provincial da Coruña acordou prorrogar ata un período máximo de 15 anos a prisión provisional de José Enrique Abuín, alias 'O Chicle', en relación á violación e asasinato da moza Diana Quer, co obxectivo de que continúe no cárcere mentres se resolven os recursos presentados pola súa defensa.
Segundo recóllese no auto, a sección sexta desta audiencia, con sede en Santiago, acolleu o venres unha vista para decidir sobre a prórroga da prisión provisional de 'O Chicle', que permanece no cárcere desde a súa detención o 29 de decembro de 2017.
Esta situación prodúcese despois de que a avogada defensora de Enrique Abuín presentase un recurso de apelación contra a sentenza condenatoria, que foi admitida a trámite. Con iso, a condena a prisión permanente revisable que a Audiencia ditou para Abuín Gey o pasado mes de decembro aínda non é firme e faise necesario dirimir os prazos da prisión provisional.
DÚAS PRÓRROGAS
O pasado dous de decembro, cando estaban a piques de cumprirse os dous anos de período máximo de prisión provisional, a Audiencia da Coruña acordou a prórroga ata o 29 de decembro de 2021 --outros dous anos--.
Con todo, naquel momento aínda non se ditou a condena a prisión permanente revisable para 'O Chicle' pola violación e asasinato de Diana Quer, unha cuestión que permitiría ampliar este período en tanto que se decide sobre os recursos e se declara, de ser o caso, a sentenza firme.
Dada a condena xa ditada, o auto da Audiencia Provincial estima que "pode fixarse" o período de prisión provisional "na metade dos 30 anos, que é o teito da pena inferior en grao". Con iso, acórdase que esta medida poida prolongarse, como máximo, 15 anos, ata o 29 de decembro de 2032.
En todo caso, o tribual lembra que este é "o tempo máximo que a norma permite" para esta medida, o que "non implica --nin é en absoluto previsible--", aclara, "que a medida poida, no caso concreto, ter necesariamente tal duración".
Fronte á condena de prisión permanete revisable para Enrique Abuín foi admitido a trámite un recurso de apelación presentado polo seu defensa, que elaborou tamén un recurso de casación contra esta medida, pedindo a nulidade e a repetición de todo o proceso e que, en principio, deberá dirimir o Supremo.
